en 2012 toda a fachada Atlántica de Galicia estará conectada por vías de alta capacidade, a través de oito infraestruturas e un investimento de 1.270 millóns de euros

“Estamos en plena execución, en pleno desenvolvemento da comunicación en vía de alta capacidade de toda a fachada Atlántica da nosa costa, desde Estaca de Bares e Ortegal ata chegar ao Miño”. Así o aseverou o presidente da Xunta, Emilio Pérez Touriño esta mañá, sinalando que este eixe de comunicación, que contará cun investimento de 1.270 millóns de euros, deberá estar operativo no ano 2012. “O ano 2012 é pois a data que nos marcamos para cambiar a xeografía deste país, para que todo o litoral Atlántico poida quedar perfectamente articulado e comunicado”, insistiu Pérez Touriño explicando que isto será posible a través de oito grandes actuacións “que entrarán en servizo paulatinamente”.

Estas oito actuacións, segundo indicou o presidente galego, propiciarán que “a fachada Atlántica de Galicia ao seu completo, todas as rías da comunidade teñan comunicación en vía de alta capacidade cos grandes eixes de comunicación do país, de maneira prioritaria coa Autopista do Atlántico, e a través dela co resto de Galicia”.

O titular da Xunta subliñou que se trata dunha actuación que “modificará as condicións de competitividade económica de todo o territorio de Galicia”, dado que é precisamente nesta zona onde, indicou, “se concentran o fundamental dos nosos problemas de conxestión, de accesibilidade e das nosas limitacións á competitividade económica”. “E por iso priorizamos e está en marcha todo este paquete de actuacións que van desde a Vía de Alta Capacidade da Costa Norte á Vía de Alta Capacidade Costa da Morte, continuando coa comunicación da Autovía e corredor de alta capacidade a Noia, a do Barbanza, a do Salnés, a de Vilagarcía, a de Marín e a de Tui-A Guarda”, sinalou. Así mesmo, Pérez Touriño indicou que estas oito infraestruturas “pechan” o arco Atlántico de Galicia nunha actuación “histórica” que fará que no horizonte do ano 2012 se teña resolto “en comunicación de futuro, confortable e de alta capacidade, todo o fundamental da nosa xeografía, ademais doutras actuacións noutros espazos do territorio da Galicia interior”.

“Esta actuación sería insuficiente se nos quedaramos só no campo das infraestruturas, aseverou Pérez Touriño”, ao respecto, lembrando que tamén é preciso actuar sobre o transporte público e que o Goberno que preside acaba de presentar a Lei de impulso do transporte público da comunidade, para garantir mellor a accesibilidade, a mobilidade e a seguridade viaria nas estradas galegas.

Investimento de 1.270 millóns de euros
Estas oito infraestruturas irán entrando en servizo de forma escalonada ao longo dos vindeiros anos, de xeito que no ano 2012 a totalidade destes corredores estea operativa. Para acadalo, o Goberno galego está a acometer un investimento superior aos 1.270 millóns de euros que permitirá poñer en servizo 294 quilómetros de novas vías.

A vía de alta capacidade da Costa Norte, que unirá Ferrol con San Cibrao, terá este ano o 60% do seu trazado en obra, licitación ou expropiación. Esta infraestrutura de 90 quilómetros conta cun investimento de máis de 276 millóns de euros e estará operativa en 2011.

A vía de alta capacidade da Costa da Morte, que unirá a comarca fisterrá con Carballo e A Coruña, conta cun trazado de 62 quilómetros e un investimento de 342 millóns de euros.

Dentro da conexión Santiago-Noia, estanse actualmente acometendo os traballos necesarios para unir en autovía ou vía de alta capacidade a capital de Galicia con Muros e Noia a través dun investimento global de 280 millóns de euros e máis de 43 quilómetros de novas vías.

A autovía do Barbanza, actualmente en plena execución, permitirá vertebrar a comarca mediante unha actuación de mellora da mobilidade e da seguridade viaria que permitirá obter unha nova infarestrutura de máis de 40 quilómetros e máis de 127 millóns de euros de investimento.

A autovía do Salnés, tamén en execución de obras, supón un investimento superior aos 55 millóns de euros que financian a construción dunha infraestrutura de 17 quilómetros.

Así mesmo, as obras da VAC de Vilagarcía contan cun orzamento de 20 millóns de euros para financiar actuacións en 7,6 quilómetros dunha nova vía de alta capacidade.

Respecto da VAC de Marín, trátase dunha actuación sobre 8 quilómetros de viais de alta capacidade e un orzamento de máis de 54 millóns de euros.

Finalmente, a vía de alta capacidade Tui-A Guarda conta cun orzamento de 120 millóns de euros para acometer obras en 27 quilómetros de vías.

Corredor Brión-Noia
Durante a súa intervención durante o acto de colocación da primeira pedra do corredor Brión-Noia, no treito entre Brión e Martelo, Emilio Pérez Touriño subliñou a importancia que vai ter esta infraestrutura xa que, conxuntamente coa autovía Santiago-Brión, permitirá conectar a capital de Galicia e a súa área de influenza co litoral de Muros e de Noia. O máximo mandatario galego remarcou que se trata dunha infraestrutura “que vai vertebrar toda esta área de influenza, vital e decisiva, tanto polo volume de poboación que acolle, como pola dinámica e actividade que ten”.

Segundo manifestou o presidente galego na súa intervención a Xunta destinará un total de 280 millóns de euros para “abrir Santiago ao mar”, cifra que xorde de sumar o investimento da autovía Santiago-Brión (108,8 millóns de euros); o corredor Brión-Noia (85,9 millóns de euros); e a variante de Noia (aínda pendente de declaración de impacto ambiental).

Na súa intervención, Emilio Pérez Touriño avanzou que a previsión do Goberno galego é que o treito Martelo-Noia do corredor sexa licitado neste primeiro trimestre do ano e que tamén se poidan adxudicar as obras en 2008.

Pola súa banda, a conselleira de Política Territorial, Obras Públicas e Transportes, María José Caride, fixo referencia á autovía Santiago-Brión, asegurando que se porá en servizo xa en febreiro.

Dobre valor das infraestruturas
Por último, o xefe do Executivo autonómico incidiu no dobre valor que teñen as infraestruturas do transporte: por un lado, como actuacións que garanten mobilidade e permiten resolver os problemas de accesibilidade, mellorar a seguridade vial, a confortabilidade dos usuarios e a competitividade; e por outro como factor de dinamización económica, xa que toda obra pública significa unha inxección de recursos “dun alto interese e dun alto valor”.

Neste sentido incidiu nas medidas xa anunciadas polo Goberno galego para dinamizar a economía da comunidade, como a reforma do imposto de sucesións e doazóns, ou o Plan de Dinamización de Obra Pública, que permitirá que neste ano 2008 se liciten obras por valor de 1.575 millóns de euros, dos cales 761 millóns de euros serán licitacións en infraestruturas de transporte.