Máis calor e choivas extremas en Galicia co cambio climático

A pesar de que o outono do 2007 foi o máis seco dos últimos 50 anos, o certo é que non responde a unha tendencia que os expertos en meteoroloxía de Galicia veñan detectando a través de diferentes informes. O último, un que elaboran actualmente catro técnicos de Meteogalicia, apunta a que as precipitacións serán cada vez máis frecuentes en Galicia durante os meses de outono, tal e como marca a tendencia dunha análise efectuada desde 1950 ata 2006.

Esta conclusión responde a un estudo máis amplo no que analizan a evolución das precipitacións e as temperaturas extremas na comunidade galega. No segundo caso os resultados son máis contundentes, asegura Raquel Cruz, quen sinala igualmente que si se detecta que nos meses de outono son cada vez máis frecuentes os días de choivas consideradas extremas, pese ó "anómalo" 2007.

Algúns estudos preliminares, explica, non marcaban unha tendencia clara no cómputo global anual da choiva en Galicia. O caso é que ó "fiar máis fino", isto é, ó establecer unha análise máis concreta mes a mes ou ata día a día; si se percibía un incremento significativo das choivas extremas no outono. Todo apunta, xa que logo, a unha nova distribución das choivas en Galicia, o que pode traducirse nun cambio da frecuencia de días de choiva e nos días de choiva extrema.

O mes de febreiro como novo símbolo das estiaxes

Este incremento da precipitación nos meses de outono achácano ó incremento da intensidade das choivas, algo que se compensa con outras estacións, pois na primavera percíbese un descenso na frecuencia dos días de choivas extremas e tamén nalgúns meses de inverno, como o de febreiro.

Isto significa, pois, que aínda que a precipitación anual total se manteña, si varía a súa presenza en función dos meses, algo que podería chegar a afectar a algúns cultivos propios da comunidade.

Chegar a estas conclusións require un arduo traballo, pois é necesario analizar ata datos día a día para determinar en cada zona da comunidade galega o que se considera unha temperatura ou unha precipitación extrema, pois isto varía en función do lugar.

Os resultados obtidos no referente a temperaturas extremas son máis contundentes, segundo Raquel Cruz, e ademais coinciden coas conclusións doutros estudos que analizaron a situación estatal ou internacional. Deste xeito, tamén en Galicia se detecta un incremento na "frecuencia de días extremos" no que ás temperaturas se refire.

Así, entre as conclusións atópase un aumento significativo da frecuencia de días calorosos, atribuído ó incremento da primavera. Así mesmo, tamén se detectan máis noites cálidas durante o verán. Paralelamente a estes resultados, obsérvase, segundo este informe, un descenso na frecuencia dos días fríos que é xeneralizado durante todo o ano.

Os catro expertos que traballan neste estudo (Raquel Cruz, Anxos Lago, Ana Lage e Santiago Salsón) prevén que nos meses próximos se poidan presentar uns resultados máis pormenorizados sobre a tendencia que o clima depara para Galicia de acordo coa análise realizada en varias décadas.

Dado que existen diferenzas entre uns e outros puntos de Galicia, a análise efectuouse por estación e prevese fixar tamén a tendencia dos diferentes puntos de Galicia.

PERSPECTIVAS Cambiarán os ciclos do cultivo, como o da herba e o do millo

As choivas, en determinadas épocas, son fundamentais para algúns cultivos. Así o constatan os representantes dos sindicatos agrarios, que consideran que de producirse un escenario como o que expón o informe de Meteogalicia, notarase a repercusión no ámbito agrario e, sobre todo, gandeiro, tal e como constatan tanto desde Unións Agrarias como desde Xóvenes Agricultores.

Xabier Iglesias, de Unións Agrarias, considera que unha "redistribución da choiva" durante o ano lle podería afectar, fundamentalmente, á gandería e en dous momentos. En maio, sinala, época de crecemento das praderías, son "fundamentais as precipitacións"; do mesmo xeito que entre finais de abril e mediados de xuño, momento no que se cultiva o millo. Por iso, entende, se se reducen as choivas, poderíanse producir modificacións nas épocas de cultivo. No entanto, sinala, isto non é algo novo, pois hai anos "era impensable sementar millo antes de finais de maio e agora se vai adiantando".

Unha tese similar mantén Tomás Díaz, de Xóvenes Agricultores, quen indica que "calquera variación" climática lle "afecta á agricultura", dado que os cultivos dependen do clima. En todo caso, e tamén aludindo ás praderías e ó cultivo do millo, entende que de producirse choivas extremas no outono, o resultado dependerá do mes en que se poida producir isto.

Isto é así, asegura, porque "en outono se recolle o millo" e se chove moito "antes, igual se estraga" a colleita. Alude, tamén, á recollida de uvas, que tamén se efectúa no outono, pois unhas choivas moi intensas tamén poderían acabar cos viñedos.

En todo caso, sinalan ambos, non cren que o clima "cambie dun día para outro", polo que, asegura o segundo, "se o clima cambia, cambia a época de traballar", aínda que a isto se adapte "o agro" de forma gradual.