Vocacións polo chan

Os relixiosos católicos diminuíron un 10 por cento en 2006 con respecto ó ano anterior, co que o número de persoas consagradas descendeu ata os 945.210, segundo as estatísticas publicadas na última edición do diario do Vaticano, L’Osservatore Romano. O diario do Vaticano adiantou os datos da Oficina central de estatística da Igrexa católica, que serán publicados proximamente no anuario pontificio 2006.

En detalle, producíronse un descenso de 94.000 relixiosos, deixando no mundo católico con 136.171 sacerdotes, 532 diáconos permanentes, 55.107 relixiosos non sacerdotes e 753.400 relixiosas.

Segundo este diario, se se teñen en conta só os sacerdotes, excluíndo os de dereito diocesano, no continente africano hai 11.348, así como 60.708 relixiosas.

En Asia cóntanse 21.154 sacerdotes e 155.854 relixiosas. En Europa, 52.290 sacerdotes e 315.981 relixiosas. No continente americano 42.318 sacerdotes e 211.159 relixiosas e,en Oceanía, 2.061 sacerdotes e 9.698 relixiosas.

A falta de relixiosos é un tema que preocupou ó papa Benedito XVI desde o inicio do seu pontificado, xa que en moitas ocasións rezou para o aumento das vocacións.

Nunha audiencia o pasado maio ós participantes Congreso Mundial dos Misioneiros Fidei donum, o Papa sinalou a dificultade que sofren as misións debido á falta de vocacións da Igrexa católica e ó envellecemento do clero.

Precisamente o envellecemento é un dos problemas que acusan os relixiosos en Galicia. Segundo cifras da Oficina de Estatística do Arcebispado de Santiago, sete de cada dez curas en activo na nosa comunidade superan os 65 anos, o que provoca certa inquedanza no mundo eclésiástico polo “grave risco de inmobilismo” e a “dificultade de entenderse cun mundo xuvenil tan cambiante como o actual”, advirten desde o Arcebispado.

As actuais ordenacións non son suficientes e, de feito, nas últimas catro décadas se reduciu case á metade o número de sacerdotes.

Así, segundo a arquidiocese compostelá a diminución de curas desde os anos 1970, cando se alcanzou a maior cota dos tempos modernos, foi dun 35,63 por cento, mentres que nos últimos doce anos este descenso foi dun 14,6 por cento. En cifras, no ano 1970 había na Diócese 1.034 sacerdotes, fronte ós 615 actuais –deles, máis de 430 superan os 65 anos–.

Atenden o dobre de fregueses que na década dos 65
A esta situación súmaselle o feito de que, ante a falta de representantes do clero, aumentou a carga de traballo destes: no ano 65 había un sacerdote por cada 1.100 habitantes; a cifra, hoxe, duplicouse ata atender 2.160 fregueses.

Polo que respecta á parte dos fieis, segundo os datos do Centro de Investigacións Sociolóxicas de 2007, o 77% dos españois maniféstase católico, un 12,4% ‘non crente’ e un 6,5% ateo. Con todo, e malia esa cifra alta de seguimento da relixión, máis da metade (53,3%) non vai a misa ‘case nunca’; fronte ó 15,9% que vai varias veces ó ano ou un 16,2% que vai ‘case todos os domingos e festivos’. Así mesmo, un 2,3% asegura acudir á Igrexa varias veces por semana. Sexa porque corren outros tempos ou porque a Igrexa en España, de polémica en polémica, non se atopa quizais no mellor momento, en Galicia rexistrouse nos últimos anos unha redución no número de matrimonios católicos fronte ó aumento, dun 45% desde 2001, dos de tipo civil. l

ORDENACIÓN

O ‘bebé’ da Conferencia Episcopal

O presidente da Conferencia Episcopal e bispo de Bilbao, Ricardo Blázquez, anunciou onte que Mario Iceta que, na actualidade, é Vigairo Xeral da diocese de Córdoba, substituirá a Carmelo Echenagusía como bispo auxiliar na diocese de Bilbao, converténdose, con 42 anos, no máis novo da Conferencia Episcopal. En comparecencia ante os medios, Blázquez informou de que o Papa, Benedito XVI, aceptou a renuncia de Carmelo Echenagusia Uribe, tras 13 anos como bispo auxiliar, e nomeou a Mario Iceta Gavicagogeascoa, como o seu substituto. Iceta naceu en Gernika (Bizkaia), diocese de Bilbao en 1965 e no 94 foi ordenado sacerdote na Catedral de Córdoba, diocese onde se incardinou.

A que inspira menos confianza

A Igrexa católica é a institución que menos confianza inspira nos españois, que a puntúan cun 4,4 sobre dez no último lugar dunha lista que encabezan as universidades (6,9) e o Consello Superior de Investigacións Científicas (6,4), segundo un estudo da BBVA no 2007. Os relixiosos son os menos valorados, cun 4,2, só superados polos políticos, que, cun 3,4, pechan unha lista liderada por médicos (7,1) e científicos (6,9).

Un de cada tres nunca reza

Malia o rotundo dato de seguidores do catolicismo (tres de cada catro españois), o nivel de relixiosidade, segundo o estudo da Fundación BBVA: a porcentaxe dos que cren sen dúbida que Deus existe é do 38,8% na poboación e do 47,8% no grupo dos católicos, cifras moi aproximadas. Case o 40 por cento (38,5%) non iría nunca a misa de non ser por vodas, funerais e bautizos e un terzo recoñece non rezar nunca