Poderase pedir o borrador do IRPF a partir deste luns

Chegou a hora de cumprir con Facenda, ou que esta responda ante os contribuíntes ós que a declaración da renda lles sae a devolver. Do próximo luns e ata o 25 de xuño poderán solicitar o borrador do IRPF e os datos fiscais os que non o pediron o ano pasado, ou os que o confirmaron no borrador da declaración. A Axencia Tributaria destacou que en ambos os casos a solicitude quedou rexistrada, e os contribuíntes recibirano no seu domicilio fiscal sen necesidade de que repitan a operación.

Xa hai 13.854.212 solicitudes de borrador e datos fiscais a través da declaración do IRPF presentada o ano pasado ou coa confirmación do borrador do 2006. Este último poderase confirmar a partir do 1 de abril e ata o 30 de xuño. Se se reúnen as condicións para recibir o borrador, a Axencia enviarao cos datos fiscais cos que se calculou.