Pérez Touriño asegura que o Goberno da Xunta ten un “compromiso activo” coa normalización da lingua galega e busca sempre “o consenso da sociedade” neste ámbito

Sostén que o galego “non é un problema de país” senón un factor de “enriquecemento cultural”. Fai un chamamento para que “non divida politicamente aquelo que non divide á sociedade”. Subliña que a Xunta está entregada “a defender e a promover a utilización do idioma galego con respecto e en convivencia co castelán” . “Aspiro a unha Galicia plurilingüe, multilingüistica, onde os galegos poidan vivir e utilizar o castelán, o galego e desde logo tamén outros idiomas que hoxe son tan necesarios e imprescindibles”, apostila.

O presidente da Xunta, Emilio Pérez Touriño, asegurou en Rio de Janeiro que o Goberno que preside posúe un “compromiso activo” coa normalización da lingua galega, compromiso que busca “sempre o consenso dos cidadáns”. Ao abeiro deste compromiso, segundo expresou Touriño, a Xunta concibe o galego como un “patrimonio de Galicia ben prezado dos galegos” e como un “factor de enriquecemento cultural da nosa identidade e da nosa colectividade” porque o galego, segundo afirmou, “non é un problema de país”.

Ademais, o presidente da Xunta, en declaracións aos medios, rexeitou que o idioma sexa utilizado como arma de división posto que o idioma “nos debe unir e non nos debe desunir”. “Unha vez máis quero facer unha apelación a que non nos divida politicamente aquelo que non divide e desune á sociedade galega, e que aprendamos da sociedade, que aprendamos da comunidade”, afirmou Touriño.

Lexítimo dereito de manifestación

Logo de expresar o seu respecto polo “lexítimo dereito á manifestación e á expresión que teñen os cidadáns”, Pérez Touriño subliñou que o “inequívoco” cumprimento da Lei de Normalización Lingüística de Galicia e do Plan de Normalización Lingüística da Comunidade marcan a folla de ruta da política lingüística do Goberno da Xunta.

“O galego debe nacer dun espazo de convivencia e de liberdade. Iso é o que debe ser e no clima no que se debe desenvolver”, apostilou Touriño quen engadiu que a Xunta está entregada “a garantir esa posición e a defender e a promover a utilización do idioma galego con respecto e en convivencia co castelán”. Xunto a isto, o presidente da Xunta manifestou o seu desexo e a súa aspiración por “unha Galicia plurilingüe, multilingüística, onde os cidadáns poidan vivir e utilizar o castelán, o galego e desde logo tamén outros idiomas que hoxe son tan necesarios e imprescindibles”.