Rajoy sempre rexeitou falar o galego

O presidente do Partido Popular (PP), Mariano Rajoy, encabeza as adhesións desta formación política ao Manifiesto por la lengua común, que pretente apontoar o rango do castelán como único idioma de coñecemento obrigado no Estado fronte aos idiomas cooficiais. Dáse a circunstancia de Rajoy, nacido en Compostela e criado en Pontevedra, nunca falou galego, nin sequera cando foi vicepresidente da Xunta durante o Goberno do PP con Xerardo Fernández Albor.

Nesa etapa foi, precisamente, cando o agora defensor acérrimo do castelán amosou a súa nula disposición para falar galego, mesmo publicamente. Desde entón, en ningunha das súas visitas a Galicia, e malia exercer sempre de galego, se apartou do castelán como lingua vehicular.

Esta aversión foi criticada en varias ocasións polo que agora foi un dos seus máis firmes defensores dentro do PP, Manuel Fraga Iribarne. Cando se barallaba a posibilidade de que Rajoy fose o seu sucesor á fronte da presidencia da Xunta, Fraga recomendoulle que se quería facer carreira en Galicia debería "casar" -daquela o líder actual da dereita española estaba aínda solteiro- e sobre todo falar galego. Rajoy nunca lle fixo caso aos seus consellos.

Porén, agora, non dubida en colocarse en primeira liña da ofensiva do nacionalismo español contra as linguas cooficiais e anuncia unha lei orgánica que garanta a hexemonía do castelán en todas as comunidades plurilingües. Canda Rajoy, asinaron o manifesto a secretaria xeral do PP, María Dolores de Cospedal, e os vicesecretarios Ana Mato, Javier Arenas e Esteban González Pons. Tamén se adheriron varios membros do partido en Cataluña, como Daniel Sirera, e Alejo Vidal-Quadras, ademais de escritores, como como Miguel Delibes, Luís Mateo Díez, Francisco Nieva e César Vidal. A maior parte deles adheríronse a través da edición dixital do xornal El Mundo.

A outra formación política que apoia decididamente o manifesto, e que mesmo foi a súa impulsora, foi Unión, Progreso y Democracia (UPyD). Un dos seus membros, o filósofo Fernando Savater, ironizou onte sobre as palabras da ministra de Educación, Mercedes Cabrera, que non considera que o español corra perigo. "Negar a evidencia é a arma do Goberno para tapar as súas miserias", asegurou.

AO OUTRO LADO

"Queren facernos residuais", di ERC

A portavoz de ERC no Parlamento catalán, Anna Simó, denunciou o intento dun grupo de intelectuais de converter o catalán nunha lingua "residual". Para Simó, o manifesto "non é nada novo, é a cancionciña de sempre", pero demostra que hai unha serie de intelectuais que "queren residualizar aínda máis a lingua catalá".