A Mesa denuncia o xuíz decano da Coruña por facer 'apoloxía da desobediencia da legalidade'

O xuíz decano, Antonio Fraga Mandián, recoñece no transcurso dun xuízo que el incumpre conscientemente a lei: “No tengo ningún rubor en usar la ilegalidad del topónimo ‘La Coruña’”

A Mesa pregúntase “que será dos cidadáns normais cando determinados xuíces manifestan sen pudor que incumpren as normas que queren”

A Mesa pide que se aclare se este xuíz tamén “incumpre sen rubor” outras leis

A Mesa pola Normalización Lingüística vai presentar unha denuncia perante o Consello Xeral do Poder Xudicial contra o xuíz decano da Coruña, quen nun xuízo celebrado esta semana declarou: “No tengo ningún rubor en usar la ilegalidad del topónimo ‘La Coruña’”, facendo así apoloxía da desobediencia da legalidade, especialmente grave ao se tratar dun maxistrado, quen non debería guiarse por ningún outro criterio na súa función pública que non fose o da plena aplicación da lei.

O presidente desta entidade en defensa da lingua, Carlos Callón, lembra que “cando este xuíz prometeu o cargo, prometeu, entre outras cousas, que ía acatar o ordenamento xurídico, e en particular cumprir e facer cumprir a lexislación”. Dentro do ordenamento xurídico está que o topónimo “A Coruña” é a única forma oficial, tanto por unha lei autonómica de 1983 como por unha lei estatal de 1998.

“A este maxistrado algunhas normas válenlle (as que lle permiten reclamar por inxurias) e outras non (as que determinan a toponimia oficial)”, denuncia Callón, quen tamén se interroga se o cumprimento da lexislación “debe ficar ao arbitrio dos destinatarios” e “que será dos cidadáns normais cando os xuíces manifestan sen pudor que incumpren certas leis”. O presidente da Mesa pide tamén que se aclare “se hai máis normas legais que este xuíz vulnere sen rubor”.

Desde o comezo deste caso, Antonio Fraga Mandián sostivo que se na documentación e no selo do xulgado se utilizaba “La Coruña” se debía a un “erro ortográfico sen importancia”, o cal só pode ser cualificado como “unha actitude cínica”. Ademais, o xuíz decano chegou mesmo a defender nos medios de comunicación ese uso de “La Coruña”. Porén, no desenvolvemento da vista oral nesta semana o maxistrado mostrou que realmente non se debía a un erro, senón a unha vulneración consciente do marco legal pola súa banda, como así ben o testemuñan as súas propias palabras.

Cómpre lembrar que este xuízo se produciu porque o maxistrado denunciou a un veciño da Coruña, Eduardo Álvarez, despois de que este reclamase recibir a súa notificiación xudicial en galego e co topónimo oficial. Os medios de comunicación recibiron a resposta antes que o veciño e nela Fraga Mandián negáballe os seus dereitos e consideraba o uso de “La Coruña” (na carta e no carimbo) como un “erro ortográfico”. O cidadán criticou a difusión da resposta aos medios, utilizando ademais o seu nome sen o seu consentimento, e considerou o contido coa seguinte declaración literal: “Din os dicionarios que cínico é quen mente para xustificar unha ilegalidade. Isto é o que está a facer o xuíz decano”. O decano presentou a antedita denuncia contra o veciño por inxurias, o cal só pode ser cualificado como “unha tentativa de amedrentar as persoas que quixeren reclamar os seus dereitos lingüísticos perante a Administración de Xustiza, pois converte o exercicio destes dereitos nun feito puníbel e perseguíbel”.

Naquel primeiro xuízo, celebrado hai un ano, producíranse un cúmulo de irregularidades que favorecían descaradamente ao denunciante. Cómpre lembrar que quen denunciaba era xustamente un xuíz e que a xuíza que tiña que resolver tiña e ten con el unha relación de dependencia e de subordinación gobernativa.

Debido a estas notorias irregularidades, a Audiencia Provincial considerou nulo o xuízo e ordenou repetilo con todas as garantías propias dun Estado de Dereito, razón pola cal se volveu realizar esta semana. A sentenza da Audiencia Provincial foi un contundente correctivo á parcialidade mostrada tanto pola maxistrada como polo Ministerio Fiscal.