Tráfico incumpre a lei ao non dirixirse en galego nin a quen así o demanda

O Estatuto básico do empregado público garante a atención en galego, porén as administracións continúano vulnerando.

A Dirección Xeral de Tráfico (DXT) incumpre a lexislación vixente ao non empregar o galego nin tan sequera con aqueles usuarios que así o solicitan, tal e como denuncia A Mesa pola Normalización Lingüística. A asociación en defensa da lingua galega, que xa se dirixiu á propia DXT para que corrixa a situación, constatou que cando menos a Xefatura Provincial de Tráfico da Coruña non emprega o galego nin cando é a lingua coa que as persoas interesadas se dirixen á devandita entidade.

A Xefatura Provincial de Tráfico, ao depender da administración estatal, debe cumprir a lexislación lingüística existente que engloba a todas as empregadas e empregados públicos. Son, neste caso, fundamentais os artigos 35.d e 36.1 da Lei 30/1992, do 26 de novembro, de réxime xurídico das Administracións públicas e do procedemento administrativo común, xa que indican expresamente que a cidadanía ten o dereito "a empregar as linguas oficiais no territorio da súa comunidade autónoma, de acordo co previsto nesta lei e no resto do ordenamento xurídico", do mesmo xeito que "os interesados que se dirixan aos órganos da Administración xeral do Estado con sede no territorio dunha comunidade autónoma poderán utilizar tamén a lingua que sexa cooficial nela. Neste caso, o procedemento tramitarase na lingua elixida polo interesado."

No caso que aquí se denuncia, o inicio do trámite polas persoas interesadas é en galego, mais non así as respostas das persoas instrutoras, que é sistematicamente en español. Asistimos, pois, á conculcación da lei devandita, mais tamén á infracción do artigo 54.11 da Lei 7/2007, do 12 de abril, do Estatuto básico do empregado público, que expón como principio de conduta "garantir a atención ao cidadán na lingua que o solicite sempre que sexa oficial no territorio", como é o caso do galego, lingua propia de Galiza e cooficial desde hai máis dun cuarto de século, a pesar de que moitas administracións actúen de costas a esta realidade xurídica, histórica e social.