"As nosas medidas fronte á crise anticípanse ás aprobadas onte pola UE"

O presidente da Xunta, Emilio Pérez Touriño, salientou onte que as medidas que está a tomar o Goberno galego para paliar a situación de crise e, en especial, a caída da demanda no sector do automóbil, se anticipan e van na mesma liña que as acordadas onte pola Comisión Europea.

Na rolda de prensa posterior ao Consello da Xunta, o máximo mandatario galego destacou que hoxe mesmo, na súa xuntanza semanal, o Goberno que preside autorizou o acordo para a sinatura dos convenios de colaboración entre a Consellería de Traballo e as empresas do sector da automoción. Trátase dun investimento total de 10 millóns de euros, e dunha contía máxima por convenio de 400.000 euros, destinado a aquelas empresas que sufran unha parada obrigada da súa produción para que impartan, durante este período de paro, formación especializada aos traballadores.

É, segundo relatou Pérez Touriño, "unha medida innovadora, pioneira, que vai na dirección do que onte aprobaba e presentaba como plan a Comisión Europea".

"Ao final, a UE plantexa un paquete de orientación política e de medidas que xustamente coinciden coas que vén tomando a Xunta de Galicia aínda que algúns non vexan máis que elementos para a crítica", aseverou o máximo mandatario galego.

Pérez Touriño explicou que as accións tomadas pola Unión Europea teñen por obxectivo "fortalecer, apuntalar as empresas e o emprego" e van na dirección da "empregabilidade e a formación"; medidas de axuda ás empresas, nas que se recollen as de compoñentes, unhas axudas nas que, segundo indicou Touriño, "aquí, en España, está xogando o ICO e no ámbito europeo o fará o BEI"; medidas na dirección das infraestruturas; e medidas de fomento do I+D. Un conxunto de actuacións que, en palabras do presidente galego, mobiliza "recursos propios por valor de 30.000 millóns de euros".

Medidas acordes co Plan integral do automóbil

Así mesmo, o máximo mandatario autonómico tamén destacou que as medidas postas en marcha polo Goberno que preside se anticipan e son acordes coas que recollerá o futuro Plan integral do automóbil, que se presentará no vindeiro mes de xaneiro e que foi abordado na xuntanza celebrada o pasado martes en Santiago de Compostela entre as comunidades autónomas con plantas de automoción e o Goberno español, encabezadas polo ministro de Industria, Turismo e Comercio.

Segundo indicou Pérez Touriño, o plan recollerá aspectos no terreo sociolaboral, eido no que "a Xunta de Galicia é a primeira que se anticipa en España a tomar esas medidas, que xustamente configura agora nun marco máis amplo a Unión Europea, co Fondo social europeo, a formación e a empregabilidade"; medidas de apoio financeiro ás empresas -nas que a Xunta "se volve anticipar sendo a primeira comunidade e o primeiro Goberno de España que toma medidas utilizando créditos ICO e que agora Europa utiliza créditos BEI para financiar directamente a pequenas e medianas empresas para que lle chegue o capital circulante e liquidez", explicou Touriño-; e medidas no ámbito tecnolóxico, no I+D e no cambio de modelo, para gañar en competitividade e produtividade. "E aí -engadiu o titular da Xunta-, entran proxectos de medio alcance como a fabricación do vehículo eléctrico". "Ese é o futuro, a perspectiva", aseverou rexeitando as críticas que se produciron neste sentido e lembrando que a propia Unión Europea confirma no seu plan "xustamente ese proxecto".

Medidas globais e respostas coordinadas

O presidente Xunta insistiu en que estamos ante a primeira "gran crise económica global" e por iso precisa de respostas globais e coordinadas.

"A tese que impulso desde o primeiro momento e que creo que comparten todos os dirixentes políticos, no ámbito europeo e mundial, é que as medidas teñen que ser globais, coordinadas, concertadas; que son compatibles as respostas no ámbito rexional, autonómico, local, pero hai que concertar e integrar esas medidas na mesma dirección para gañar en potencia e en intensidade" fronte a crise, aseverou Touriño.

"Estamos entre todos, os que estamos en disposición de traballar e remar na mesma dirección, e aí temos que estar todos, é fundamental que esteamos todos, buscando solucións e non creando problemas", engadiu o máximo mandatario galego ao respecto aseverando que "queremos formar parte da solución e nunca do problema". "Esa é a vocación do país e debe ser a vocación e o compromiso de todos", sinalou.

Emilio Pérez Touriño lembrou que non hai "variñas máxicas" senón que o único camiño, "o que estamos tomando desde o primeiro día, é buscando respostas, solucións, anticipando, coordinando e tratando de salvar o túnel da crise".

Fronte a isto, contrapuxo a actitude do Partido Popular e dixo que é difícil entender a súa actitude de "colocarse á contra de todo". "Non se poden facer trampas no solitario", indicou Touriño lembrando que o PPdeG pregunta polo mal que vai a situación e non polas solucións que se poñen enriba da mesa. "O que é evidente é que se pasa a formar parte do problema e non formar parte da solución", engadiu subliñando que hai "quen escolle formar parte do problema e non formar parte da solución", en relación ao responsable do PPdeG.

A este respecto, o presidente da Xunta fixo un chamamento á oposición para "cambiar de actitude e abandonar a posición fácil de reiterar cada día que a economía marcha mal" e "poñerse ao lado do traballo, da solución, do mesmo lado".

Confianza no país

O máximo mandatario autonómico expresou a súa convición en mudar a situación e saír fortalecidos da crise: "Teño a convición profundamente esperanzada, confío neste país sen límites na confianza e teño a plena convición de que Galicia vai saír adiante desta crise. E o que temos que tratar é que a recuperación sexa o antes posible e co menor impacto posible. Esa é a miña obriga como presidente, tratar de tomar medidas e tomar medidas", aseverou. Por iso apelou, unha vez máis "á unidade, á necesidade de remar e non a facer que a vía de auga a ser posible sexa máis grande".

"Confío en que, antes ou despois, esta posición de unidade, de traballar na mesma dirección, de concertar, gañe en Galicia; estou seguro que en Galicia terminará gañando, os cidadáns estou seguro que o queren e terminarán empurrando nesa dirección. Desde logo o presidente da Xunta non parará cada día de intentalo e de convocar a sumar vontades e non buscar os puntos de diferenza", concluíu.