O presidente da Xunta anuncia un novo paquete de medidas encamiñadas a favorecer o investimento, reforzar a capitalización do país, a apoiar os sectores sociais máis desfavorecidos e a reactivar o consumo

O titular da Xunta, Emilio Pérez Touriño, avanzou onte que o Goberno que preside porá en marcha un terceiro paquete de medidas económicas encamiñado a favorecer o investimento, reforzar a capitalización do país, a apoiar os sectores sociais máis desfavorecidos e a reactivar o consumo. "Trátase dun terceiro grupo de medidas que vai apoiar o investimento, reforzar a capitalización do país, bombear investimento para paliar a caída da inversión e a retracción do mercado e da actividade económica, dar apoio financeiro ás actividades nas empresas, en particular, ás pemes (dirixida neste momento ao circulante, aos problemas a curto), de apoiar os sectores sociais, as familias, e axudar a reactivar o consumo, evidentemente no marco das nosas responsabilidades e das nosas competencias", asegurou Touriño.

Na rolda de prensa posterior ao Consello da Xunta, o presidente galego explicou que este grupo de medidas, dividas en catro categorías -xeración de emprego, iniciativas de apoio ás actividades estratéxicas con dificultades, apoio aos colectivos sociais máis afectados pola crise e reforzo do autoemprego-, están en sintonía coas xa aprobadas polo Goberno que preside desde xaneiro deste mesmo ano. Así mesmo, avanzou que na súa comparecencia a petición propia no próximo pleno do Parlamento, explicará á Cámara todo este conxunto de actuacións, avaliadas hoxe polo Goberno galego.

Axudar á creación de emprego

A primeira liña de medidas vai na dirección de incentivar e poñer en marcha programas de gasto que axuden a xerar emprego e a crear ocupación, segundo resaltou Touriño. Trátase, engadiu, "de medidas de xeración de emprego directo desde a propia actividade pública".

Este programa contará cun investimento total de 19 millóns de euros e permitirá a creación de 2.000 empregos, arredor de tres tipos de actividade: en materia de mellora ambiental, para poñer en valor os recursos naturais, actuando en sistemas fluviais e en espazos naturais, na súa limpeza e conservación, cun orzamento de 5 millóns de euros; actuacións en conservación, en mantemento do patrimonio viario da comunidade, de infraestruturas de transporte e, en particular, estradas, cunha dotación financeira de 5 millóns de euros; e actuacións no ámbito rural, de carácter silvícola e preventivas nos montes da comunidade, cun financiamento próximo aos 9 millóns de euros.

Segundo resaltou o presidente galego, son tres tipos de actividade "intensivas en man de obra", que se poñerán en marcha de maneira inmediata, xa "no mes de decembro e por un período de contratación inicial de seis meses de duración".

Apoio ás actividades estratéxicas con dificultades

Respecto ao segundo eixo de actuación, Emilio Pérez Touriño sinalou que está relacionado co apoio a actividades de sectores estratéxicos en dificultade e, en particular, "de maneira específica", prevé a elaboración dun Plan de apoio ao sector da automoción. "O que facemos, en concreto, é desenvolver un plan extraordinario de formación, por un importe de 10 millóns de euros, dirixido a realizar accións de formación e capacitación para un potencial de 10.000 empregados", neste período, dixo Touriño, de "descenso brusco, de caída da carga inmediata que está prevista para o mes de decembro, derivada da paralización da actividade nun número importante de días, prevista e anunciada, programada por parte da empresa matriz, Citröen", explicou. Unha redución de carga de traballo na empresa Citröen que tamén terá efectos "inmediatos sobre a industria auxiliar e de compoñentes".

Por iso, engadiu, "tomamos medidas nesa dirección, con carácter inmediato, para este mes de decembro, que se desenvolverán mediante os correspondentes convenios, autorizados no próximo Consello da Xunta, no que se instrumentará esta medida xuridicamente". Deste xeito, a Consellería de Traballo, responsable na materia, asinará convenios, "empresa a empresa", cunha achega á formación máxima de 300.000 euros por convenio, e onde a empresa beneficiaria tamén se comprometerá a achegar unha partida orzamentaria para este fin, arredor do 40 por cento do financiamento desta formación.

Emilio Pérez Touriño subliñou que estas medidas xa foron tratadas no Foro do automóbil e avanzou que mañá mesmo se reunirá co Clúster da Automoción en Vigo, e co director xeral de Citröen para avalialas e implementalas.

O presidente da Xunta lembrou, ademais, que o sector da automoción é estratéxico para a economía europea, para as economías occidentais e para a española, pero, "de maneira determinante", tamén para a galega. Así mesmo, salientou que estamos a falar dun sector galego "extraordinariamente competitivo" no mercado internacional. Explicou que "corremos o risco, coa entrada da crise e coa forte redución da demanda no mercado da automoción (estimada nun 40 por cento), de que un sector estratéxico e competitivo da nosa economía puidera quedar irreparablemente danado, mutilado". De aí, engadiu, a necesidade de poñer en marcha medidas coma esta, para tratar de "axudar e complementar medidas que vaian na dirección de que Galicia non perda esa posición competitiva e estratéxica para o emprego, para a actividade, para a innovación, e para o desenvolvemento tecnolóxico", aseverou.

Incentivar o consumo das familias

Respecto á terceira liña de actuación, de apoio aos grupos sociais máis desfavorecidos, Emilio Pérez Touriño indicou que se trata de actuar sobre a capacidade de consumo das familias para evitar a caída da demanda. Medidas que van nunha tripla dirección: a adquisición de vivenda, a compra de bens de consumo duradeiro (automóbil, e a reformas de vivendas encamiñadas ao aforro enerxético e á sustentabilidade.

"Trátase de subvencionar ao 100 por cen, polo tanto, sen custo algún para a familia, un seguro de pagos protexidos a todos os traballadores galegos que formalicen un préstamo para a compra de vivenda, automóbil ou plan de reforma", evitando que o traballador "teña que pagar as cotas do préstamos se se queda en paro ou sufre unha incapacidade temporal", abondou Touriño. Esta medida, segundo adiantou, articularase mediante unha achega por parte da Xunta de 10 millóns de euros, que deberá permitir formalizar arredor de 850 millóns de euros de financiamento ás familias.

"Propoñemos medidas novidosas en toda España", insistiu, lembrando que "unha vez máis tomamos e anticipamos medidas" para que "ninguén en Galicia pospoña a súa decisión de investimento ou de gasto ante o temor, a inseguridade e o risco de quedarse en paro".

"O Goberno galego toma a iniciativa diante da crise", con esta actuación "proactiva, dirixida a dinamizar o consumo e o investimento das familias, que son claves para frear a crise", remarcou. Explicou, ademais, que non se trata só dunha actuación "paliativa, para minorar o impacto que a crise ten sobre os desempregados, senón que tamén constitúe unha medida complementaria" das postas en marcha polo Goberno central.

Isto, insistiu Touriño, debe permitir mellorar a confianza das familias "ante a incerteza e, polo tanto, incentivar o consumo en bens duradeiros", dinamizando o investimento en vivenda, construción e automóbil, sectores claves "na recuperación económica", que están sufrindo "de maneira moi intensa o impacto da crise", segundo manifestou o presidente da Xunta.

Reforzo do autoemprego

A última medida avanzada hoxe polo máximo mandatario autonómico ten unha dotación de algo máis de 10 millóns de euros e será posta en marcha a partir do 1 de xaneiro. Consiste en incentivar aos parados de longa duración que accedan ao autoemprego, a través do aumento das axudas de asistencia técnica e apoio á función xerencial.

Trátase, en definitiva, "dun novo impulso, de novas medidas de reactivación económica que reforzan e van na mesma liña na que viñamos traballando ata agora, porque non hai outra "receita en ningunha economía occidental", senón a "anticipación", aseverou Touriño concluíndo que "Galicia está a responder deste xeito, anticipadamente".

Adquisición do grupo catalán Hispano Igualadina por Monbús

O presidente da Xunta, Emilio Pérez Touriño destacou, ademais, que a compra do grupo catalán Hispano Igualadina por parte do grupo galego de transporte de viaxeiros por estrada Transmonbús, converte a empresa galega na primeira empresa de capital español de transportes de España.

Emilio Pérez Touriño explicou que o Consello da Xunta de hoxe aprobou un acordo polo que o Igape apoia esta operación de expansión promovida polo grupo galego de transporte por estrada Transmonbús, a través dun aval por importe máximo de 6 millóns de euros destinado a garantir o 28,5 por cento dun préstamo bancario por importe máximo de 21 millóns de euros.

Trátase, resaltou o presidente da Xunta, "dun exemplo de aproveitamento en condicións de crise económica para fortalecer a capacidade competitiva e aproveitar as oportunidades e as condicións de competitividade no mercado".