A postura de Núñez contra o ensino en galego é o "primeiro gran paso atrás para a lingua desde a chegada da democracia"

A Mesa pola Normalización Lingüística considera que as medidas anunciadas por Alberto Núñez contra o ensino en galego atentan contra toda a lexislación en materia lingüística da etapa democrática. Para o presidente da asociación en defensa do idioma, Carlos Callón, trátase "do primeiro gran paso atrás para a lingua desde a chegada da democracia" e un "atentado contra principios básicos recollidos no Estatuto".

Por iso, a asociación, que vai celebrar a súa asemblea xeral o próximo 28 de marzo, chama a toda a sociedade galega a unirse á manifestación que percorrerá as rúas de Santiago de Compostela o vindeiro 17 de maio, unha cita que "ten que ser histórica" para parar a "involución lingüística" que intenta impor o Partido Popular.

A Mesa quere ser a "casa común" en defensa do idioma, por iso convoca a vindeira segunda feira (luns), 9 de marzo, na Galería Sargadelos de Compostela, unha reunión aberta a todas as asociacións e colectivos que queiran defender a lingua para definir os próximos pasos a dar e para conseguir a implicación de toda a sociedade galega na marcha polo galego. O ano pasado máis de 500 entidades apoiaron a manifestación do 18 de maio, que so o lema "Polo dereito a vivirmos en galego" congregou máis de 25.000 persoas en Santiago. O obxectivo é que este ano se sumen aínda máis entidades, tras a ruptura unilateral por parte do PP de "todos os consensos históricos en favor da lingua e que contaron co respaldo unánime de toda a comunidade educativa", tal e como manifestou Carlos Callón esta mañá nunha conferencia de imprensa na que tamén participaron Iria Taibo, secretaria xeral da Mesa, e Fran Rei, coordinador de Zonas da asociación.

O presidente da Mesa recordou que o actual decreto de galeguización do ensino (124/2007) que agora quere derrogar o PP contou no seu momento co apoio dos tres grupos parlamentares, incluído o propio Partido Popular, así como do Consello Escolar de Galiza, os sindicatos que representan ao 90 por cento do profesorado, a confederación de centros educativos católicos concertados, a Federación de ANPAS públicas, todos os movementos de renovación pedagóxica e todas as asociacións de estudantes con presenza en Galiza, entre outros colectivos.

Carlos Callón, quen anunciou que A Mesa vai solicitar reunións tanto con Feijóo como cos futuros responsábeis de Política Lingüística e de Educación en canto tomen posesión, recordoulle ao próximo presidente da Xunta que "a crise non se resolve atacando á cultura e ao noso ADN como pobo, que é unha das potencialidades de Galiza e elemento de cohesión". "O feito de gañar as eleccións non fai que as mentiras se volvan realidade, como cando falan da imposición do galego", sinalou o presidente da Mesa.

Callón recordou que tanto o uso do galego polo alumnado nas materias de impartición nesta lingua como o emprego de materiais neste idioma non son novidades do decreto aprobado no 2007, senón que xa estaba incluído no decreto do 95, impulsado polo goberno de Manuel Fraga, "igual que nas diferentes ordes e decretos aprobados para protexer o galego no sistema educativo tras o final da Ditadura, tamén gobernando Alianza Popular ou o Partido Popular".

"Se as materias son impartidas en galego non é para que o profesorado teña que practicar a lingua, senón para que o alumnado adquira as competencias neste idioma, que é un dos obxectivos básicos da escolarización", sinalou o presidente da Mesa pola Normalización. "Os estudantes o que teñen é que formarse, ese é o seu dereito", apuntou Callón, quen recordou que "Núñez vai en contra de todas as normas sobre galeguización do ensino impulsadas na democracia, volvendo á situación do tardofranquismo", sinalou, en referencia ás normas legais que, aínda estando vivo o ditador, comezaron a autorizar o ensino nesta lingua.