O PP ataca a lingua galega

José Manuel Lage Tuñas, deputado pertencente ao Grupo Parlamentario dos Socialistas de Galicia, ao abeiro do disposto no artigo 152 do Regulamento da Cámara, presentou ante a Mesa a seguinte Interpelación

En pouco máis de trinta de días ocupando a Presidencia da Xunta de Galicia, o señor Núñez Feijóo tense convertido no azote da lengua galega. A mellor proba disto é a desconsideración manifestada cara o Plan Xeral de Normalización Lingüística impulsado baixo o goberno de Manuel Fraga e aprobado polos setenta e cinco deputadas e deputados do parlamento de Galicia.

A improvisación que está caraterizando algunha das accións do goberno galego está tamén presente nos anuncios feitos polos membros da Xunta de Galicia ó respecto da lingua galega. Están creando incertidume na sociedade e inquietude nunha parte moi importante da sociedade que comeza a visualizar un claro ataque ó idioma.

A ruptura do presidente Feijóo e o seu goberno co Plan que maior consenso ten acadado na historia da Autonomía de Galicia é unha proba irrefutable da política involucionista e desprotectora respecto da lengua galega.

O Plan Xeral non é un remuíño de ideas como ten afirmado o señor Conselleiro de Educación nunha intervención no parlamento de Galicia, senón un Plan con obxectivos e medidas concretas de discriminación positiva a prol da normalización lingüística no conxunto da sociedade, comezando polas administraccións públicas.

O Propio Presidente da Xunta ten afirmado tamén que «O plan de normalización lingüística non é ningunha norma, senón máis de 200 medidas a prol da normalización. A norma é a Lei de Normalización Lingüística. Nós cando fagamos un decreto temos que axustarnos ás normas"

Nos pasados días a Real Academia Galega co seu presidente á cabeza denunciaba que as primeiras decisións lingüísticas anunciadas pola Xunta de Galicias son desprotectoras da lingua galega.

A lingua galega é unha riqueza, patrimonio común de todos os galegos, lingua milenaria, posuidora dun rico acervo histórico que nos sitúa en pé de igualdade entre as culturas todas do mundo. A lingua galega forma parte consubstancial da identidade e do recoñecemento de Galicia como nación e como colectividade.

Como dicía Ramón Piñeiro, a quen este ano honramos o Día das Letras Galegas, "para que unha comunidade humana teña categoría de pobo, para que teña unidade íntima e transcendente, ha de ter unha alma de seu.

E un pobo ten alma de seu cando posúe idioma, cando fala nunha lingua propia,que tal é o que significa a palabra idioma. A lingua vén a ser a alma viva do pobo que a fala, vén a ser a súa comunidade esencial".

Estos párrafos anteriormente expostos están recollidos no comunicado da Real Academia Galega do pasado 12 de maio e recollen perfectamente o significado da nosa lingua.

É excepcional a declaración da propia Real Academia Galega, que sempre mantén unha posición institucional allea a calquera tipo de confrontación, e precisamente esa excepcionalidade é a que pon en evidencia o lonxe que está indo o Partido Popular dende o goberno da Xunta de Galicia no seu ataque á lengua galega.

Tendo en conta o grave ataque que está sufrindo o idioma galego por parte do Presidente da Xunta e do seu goberno, o deputado que asina formula a seguinte Interpelación:

1. ¿Cómo valora o Presidente da Xunta o manifesto da Real Academia Galega do 12 de maio no que se acusa ó actual goberno de tomar decisións desprotectoras da lingua galega ?
2. ¿Por qué rompe o señor Núñez Feijóo o maior consenso alcanzado nunca en materia de lengua como foi o Plan Xeral de Normalización Lingüística impulsado polo goberno de Manuel Fraga e aprobado por unanimidade no parlamento de Galicia no ano 2004?

Parlamento de Galicia, 25 de maio de 2009
Asdo: José Manuel Lage Tuñas