Manifesto do Día Internacional contra a Explotación sexual e a Trata de Persoas

Respecto, Dignidade e Igualdade

Cúmprense xa dez anos dende que a Conferencia Mundial de organizacións e redes que loitan contra a explotación sexual e o tráfico de persoas, en coordinación coa Conferencia de Mulleres reunida en Dhaka, Bangla Desh, acordase celebrar, cada 23 de setembro, a nivel mundial, o Día Internacional contra a Explotación sexual e a Trata de Mulleres, Nenos e Nenas.

Dende entón, cada 23 de setembro, o Partido Socialista e as organizacións e persoas que loitamos para erradicar ese infame comercio que algúns definen como a "escravitude do século XXI", unimos as nosas voces para chamar a atención sobre a gravidade dun problema que segue movendo, en España e no mundo, inxentes cantidades de diñeiro, que o converteron (segundo o Banco Interamericano de Desenvolvemento) no segundo negocio ilegal máis lucrativo do mundo, despois do narcotráfico.

Coa mesma claridade e contundencia con que sempre nos temos manifestado, os homes e mulleres socialistas queremos reiterar a nosa profunda convicción de que a trata de persoas con fins de explotación sexual é, ademais dun delicto que se segue cobrando cada ano innumerables vítimas, unha violación dos Dereitos Humanos, que atenta contra a liberdade, a igualdade, a dignidade e a integridade física e psíquica de millóns de vítimas en todo o mundo, que debemos combater.

Sabemos que a inmensa maioría das persoas que exercen a prostitución no noso país son mulleres estranxeiras, captadas mediante engano por redes mafiosas, e obrigadas a exercer a prostitución por medio de ameazas, coaccións, uso da forza ou abuso de poder. Rematar con esas redes de tráfico humano converteuse nun dos obxectivos deste Goberno, a pesar da aparente indiferenza que esas situacións suscitan na sociedade debido, quizais, á "invisibilidade social" das súas vítimas.

En coherencia con esta posición, ratificamos o Convenio do Consello de Europa de 2005 para a loita contra a trata, e puxemos en marcha a ferramenta política máis potente: o primeiro Plan Integral de loita contra a trata de seres humanos con fins de explotación sexual.

Un Plan dotado con 44 millóns de euros de Presuposto, que ten unha vixencia de 3 anos (2009-2011), que se articula en torno a tres eixes: atención e protección ás vítimas; loita efectiva contra as mafias, traficantes e proxenetas; e sensibilización, prevención e coordinación.

Cremos que este é o camiño a seguir, sen caer en actitudes demagóxicas e irresponsables, e actuando en coherencia cos principios definidos na Conferencia de Bangla Desh.

O PSOE quere aproveitar esta data para facer un chamamento aos medios de comunicación, institucións e sociedade en xeral a colaborar na prevención deste delicto, para reducir o número de nenas, nenos, homes e mulleres que caen nas redes deste infamante comercio. Queremos rematar coa indiferenza cara ao sufrimento e a explotación das vítimas da trata; e illar socialmente aos que escravizan, cosifican e despoxan as vítimas da trata dos seus dereitos máis elementais:

RESPECTO, DIGNIDADE E IGUALDADE