Non subirá o IVE dos produtos de primeira necesidade

A vicepresidenta segunda e ministra de Economía e Facenda, Elena Salgado, despexou onte unha soa das incógnitas que planan sobre a reforma fiscal que prepara o Executivo e que presentará o vindeiro sábado, cando o consello de ministros aprobe o anteproxecto dos Presupostos Xerais do Estado para 2010. Así anunciou que non subirá o IVE superreducido do 4% que se aplica ós produtos de primeira necesidade como o pan, o leite, os ovos ou as Vivendas de Protección Oficial. Con todo, non concretou que pasará co tipo reducido do 7% ou o xeral, do 16%.

Salgado aproveitou a rolda de prensa posterior ó consello de ministros, na que substituíu a vicepresidenta primeira, María Teresa Fernández de la Vega, de baixa tras ser operada dunha oclusión intestinal, para referirse á anunciada subida de impostos, cuxo núcleo vai incidir "no IVE e nas rendas de capital, fundamentalmente", admitiu.

Salgado recorreu á comparación co modelo fiscal doutros países para xustificar o incremento do IVE en España. Recordou que no noso país existen tres tipos neste gravame (o superreducido, do 4%, aplicable tamén ás froitas e verduras naturais, medicamentos, próteses ou cadeiras de rodas) o reducido, do 7%, e o xeral, do 16%), fronte a Estados como Alemaña, onde só existen dous: do 7 e o 19%.

Ademais, destacou que se nese país o 85% da recadación do IVE provén do tipo xeral do 19% e o 15% do tipo reducido, en España repártese case ó 50% entre ambos.

No entanto admitiu que o Executivo terá que facer "moita pedagoxía" para intentar explicar a reforma fiscal xa que "a ningún cidadán lle gusta que lle suban os impostos", pero mostrouse confiada en que os contribuíntes entendan que o incremento e a causa da "necesidade de gasto crecente".
Fuente: galica hoxe