Gravar o gran capital

O primeiro ministro británico, Gordon Brown, defendeu este sábado a posibilidade de impor un imposto global ás transaccións financeiras, a coñecida como taxa Tobin, como parte dun novo "contrato social" coa banca para que sexa máis responsable ante a sociedade e proporcione unha "xusta distribución de riscos e recompensas".

Durante a súa intervención no cumio do G-20 celebrado esta fin de semana en Escocia, Brown afirmou que é inaceptable que os éxitos da banca beneficien uns poucos mentres que as súas crises "as pagamos todos". O recadado por esta nova taxa financeira podería, segundo dixo, conformar un fondo que serviría para financiar futuras axudas á banca como as concedidas polos Estados para superar a actual crise financeira.

"Houbo propostas sobre unha taxa de garantía que repercuta no risco sistémico, un fondo de resolución, un capital para continxencias ou unha taxa de transaccións global", declarou Brown, quen fixo un chamamento á unidade de todos os países, xa que, pola contra, Reino Unido non fará nada tampouco.

"Gran Bretaña non se moverá a menos que outros se movan connosco", advertiu. "Non subestimo de ningún xeito as enormes e difíciles cuestións técnicas e prácticas que deberán superarse para (a implantación de) un sistema global cohesionado, pero non creo que estas cuestións poidan impedirnos considerar con urxencia a proposta lexítima que expuxen", agregou. Brown recoñeceu que os gobernantes non tiveron outra opción que intervir ante a gravidade da crise.

A banca, como era de esperar, contraria

A resposta ó discurso de Brown non tardou en chegar desde unha voceira da Asociación da Banca Británica (BBA), Angela Knight. "Non funciona porque é necesaria unha aplicación global perfecta ou case perfecta", afirmou Knight en referencia á taxa Tobin. Con todo, desde organizacións como Oxfam consideran que a aplicación deste gravame sería "un gran paso para superar a lea causada pola súa cobiza", segundo palabras de Max Lawson en declaracións á BBC.

No seu discurso, Brown defendeu tamén manter as axudas públicas ante as iniciativas de países como Estados Unidos, Xapón ou Alemaña que aspiran a lograr unha "estratexia de saída" que permita a eliminación destas axudas. "Sería arriscado pór en perigo a recuperación coa eliminación repentina do financiamento e o investimento que dá apoio a familias e negocios", dixo. O mandatario británico indicou que é "esencial" ademais lograr avances na negociación sobre o financiamento da loita contra o cambio climático.

En orixe, de xustiza social

A chamada taxa Tobin é un hipotético imposto sobre o fluxo internacional de capitais que foi suxerido polo economista James Tobin en 1971, Premio Nobel de Economía en 1981, cuxa instauración global foi proposta e impulsada polos movementos anticapitalistas. Estes coidan que sería un importante ingreso para combater a pobreza pero os liberais opinan que sería intervencionista.
EUROPA PRESS / EFE / galicia-hoxe