Mellor regalalo... :¡basta xa!

O agro galego entoou onte un claro ¡basta xa! na xornada de paro de seguimento masivo, an­tesala da multitudinaria mani­festación que hoxe percorrerá as rúas de Madrid. Farto de ter que regalar o froito dos seus esforzos, vendendo por de- ba­ixo do prezo real de produción a industrias e distribuidoras, o campo saíu á rúa e fixo lle­gar os alimentos directamente ós consumidores. Xóvenes Agri­cultores (XXAA), Unións Agra­rias (UUAA) e as cooperativas de Agaca repartiron gratuita­mente 6.000 quilos de patacas en Santiago e Lugo: ó produtor págaselle ata a catro céntimos o quilogramo, mentres os fo­gares pagan uns setenta; e en Compostela, tamén lles fixeron chegar ós transeúntes que pa­saban polas proximidades da praza do Toural máis de media tonelada de carne de tenreira.

Xuntos na defensa do sec­tor, aínda que non revoltos, o Sindicato Labrego Galego (SLG) preferiu organizar mercados transparentes no Obelisco da Coruña, ante o edificio da Xunta en Lugo, e na praza da da Peregrina en Pontevedra. En Santiago estaban a metros dos seus compañeiros do resto de formacións profesionais agra­rias e cooperativas, pero non hu­bo contacto. Para informar os consumidores, o sindicato colo­cou fronte a hortalizas e alimen­tos máis elaborados carteis co prezo que perciben os agri­cultores e gandeiros polo fru­to do seu traballo, e o que pagan os consumidores no punto de venda, con diferenzas que chegan a alcanzar o 1.000 por cento.

As máquinas percorrían Xinzo de Limia en Ourense nunha tractorada á chamada do SLG, mentres en toda Galicia se paralizaba a recollida de leite: todas as cooperativas pechaban a billa, e as industrias tamén decidían deixar a recado os seus camións cisterna. O comer­cio en múltiples comarcas rura­is tamén botaba o enreixado.

De éxito rotundo acusábase a escala española a primeira xorna­da de paro convocada por Asaja, COAG, UPA e as cooperativas. Non houbo inci­dentes nos máis de 200 actos reivindicativos.

BRUXELAS A UE cambia a xestión das multas polas cotas leiteiras

Mentres o agro comezaba a súa particular revolta, os ministros de Agri­cultura da UE ratificaron onte varias medidas contra a crise do sector lácteo, que consisten nun cambio na xestión das multas polas cotas leiteiras e nunha cláusula de urxencia para que Bruxelas reaccione rá­pido ante futuros problemas de prezos. Estas medidas únense ó fondo especial de 300 millóns de euros que os ministros de Orzamento da UE aprobaron esta semana para 2010.

Ademais, tamén informaban onte de que o litro de leite na Unión Europea subiu no mes de setembro un 3,7 por cento, e un 2,3 en España fronte ó mes anterior, aínda que seguen sendo moi inferiores ós de 2007 e a media de 2006: 26,24 céntimos por litro en Europa e 27,90 de media en España.
REACCIÓNS García esixe transparencia

O secretario xeral de Unións Agrarias, Roberto García, subliñou onte en Santiago que tanto a pataca como a carne son dous produtos que reflicten "mellor" o que está a pasar no agro coas marxes comerciais. Denunciou que o quilo de pataca se está a pagar ao produtor a catro céntimos, mentres se vende en supermercados a "máis de 60". "O que pedimos non son subvencións, nin que o consumidor pague máis, senón que o que nos pagan a nós de menos repercuta no consumidor", demandou García, que puxo fincapé na transparencia.

Bello: "Somos reféns da industria"

O secretario xeral de Xóvenes Agricultores, Francisco Bello, manifestou no Toural de Santiago que sen medio rural "non hai vida", polo que demanda o pagamento de "prezos xustos" que polo menos cubran o custo de produción. As súas críticas dirixíronse principalmente cara á Administración do Estado, e cualificou de "media ministra" á titular de Medio Rural, Elena Espinosa, á que acusou de non estar "sensibilizada co sector agrario" así como de "inacción", e remarcou: "agora somos reféns das industrias".

"É cuestión de estado", di Freire

A secretaria xeral do Sindicato Labrego, Carme Freire, acusou a Administración de ser a "única culpable" da situación que está a vivir o sector primario en Galicia. Sobre isto, criticou que o Goberno central non estea a defender ningunha das medidas que teñan que ver con "salvar" os sectores agropecuarios. Ademais, chamou a atención á Xunta para que converta esta problemática nunha "cuestión de Estado" igual que outras cousas "como a chegada da alta velocidade".
Fuente: galicia hoxe