A Coruña: O Concello aproba o Orzamento Municipal 2010, centrado nos servizos sociais, o impulso á actividade económica e o investimento nos barrios

O pleno municipal aprobou de forma definitiva o Orzamento Municipal para 2010 unha vez desestimadas as alegacións presentadas a este. Na súa intervención ante o pleno, a tenente de alcalde de Facenda, Carmen Marón, subliñou o compromiso do orzamento para 2010 co impulso á actividade económica na cidade, o mantemento do investimento nos barrios e o reforzo das políticas sociais municipais. A cidade dispoñerá polo tanto o ano que vén do segundo orzamento investidor máis alto da historia para facer fronte á crise, unha vez que se incorpore o Fondo Estatal. En total serán 53,4 millóns de euros destinados integramente a investimento en obras, proxectos novos e actuacións que chegarán a toda a cidadanía e a todos os barrios.

O Orzamento Municipal de 2010 ascende a 210,7 millóns de euros. A pesar de baixar un 4,34% trátase do segundo orzamento municipal máis alto da historia da cidade. É máis, esta rebaixa débese fundamentalmente á baixada dos ingresos pola participación nos tributos procedentes do Estado, que caeron un 17,9%. A pesar diso, a Facenda Municipal ten a capacidade de compensar este descenso en 14 puntos, minorando notablemente a súa incidencia nos Orzamentos Municipais. En canto ao Orzamento Consolidado, que inclúe as contas do IMCE, Emalcsa e Emvsa, alcanza os 236.000.174,76 euros, cun descenso do 3,39%.

O Orzamento é reflexo dunha Facenda Municipal saneada e forte, que a pesar da conxuntura económica é capaz de facer fronte ás súas obrigas e responder as demandas e prioridades dos coruñeses. Son unhas contas marcadas polo equilibrio e a estabilidade financeira. E a pesar da conxelación dos impostos e taxas municipais, a Facenda Municipal é capaz de amortecer cos seus propios recursos o impacto económico da conxuntura actual e dispoñer dun orzamento investidor.

Trátase dunhas contas realistas, marcadas pola austeridade, e que priorizan tres eixos fundamentais: garantir a calidade dos servizos municipais; potenciar o gasto social e educativo, e manter o ritmo investidor na cidade.

Neste sentido, garántese a execución do proxecto de cidade en marcha, pois non só se atenden as demandas e necesidades inmediatas, senón que tamén se dan pasos para afianzar programas e actuacións de futuro.

Desta maneira, o 42% das contas públicas dedícanse a investimento, políticas de emprego, promoción e xeración de actividade económica; mentres que o 35% destínase a políticas de benestar e gasto social, o que pon de manifesto o compromiso do Concello coa cidadanía.

Doutra banda, o Orzamento tamén recolle o cumprimento dos contratos con empresas e as concesións de servizos sen os que a cidade non funcionaría e que supoñen unha importante inxección económica para manter a cidade entre as mellores de España en canto a calidade dos seus servizos e ao tempo permiten favorecer o emprego e a produtividade.

Ata 160 investimentos en infraestruturas, vivenda e políticas sociais

Os principais investimentos do Orzamento Municipal, recollidas no anexo de investimentos, que alcanza os 27,4 millóns de euros, inciden de maneira especial na renovación das rúas e infraestruturas da cidade, os programas de rehabilitación de vivendas, a construción de novas instalacións municipais coma o Ágora e a aposta polo medio ambiente e a dotación de novos espazos verdes. Entre as 161 accións e proxectos de investimento recollidas no anexo, destacan as seguintes: programas de rehabilitación de vivendas (5,2 millóns de euros); construción e dotación do centro sociocultural Ágora (4,9 millóns de euros); plan de pavimentación e renovación de beirarrúas (2,5 millóns de euros); convenio co Ministerio de Fomento para a construción de vías de servizo para o enlace coa A-6 (2 millóns); construción do parque de Oza (1,2 millóns); renovación do barrio dos Mariñeiros (1 millón de euros); corredor verde da Agra do Orzán (688.000 euros); proxecto arqueolóxico no Castro de Elviña (578.000 euros); construción de novo edificio multiusos no parque da Agra que inclúe escola infantil, centro de día, centro de empresas e Casa da Muller (564.000 euros); construción do polideportivo do Castrillón (500.000 euros); implantación da administración electrónica (175.000 euros); reforma do mercado de Ramón Cabanillas (100.000 euros).

A estes investimentos (27,4 millóns de euros) sumaranse o proxectos que se desenvolverán cos Fondos Estatais, que supoñen outros 26 millóns de euros para actuacións na cidade, sumando así os 55 millóns de investimento que o Goberno Municipal executará o próximo ano.

Preto de 150 convenios de colaboración con entidades sociais

Doutra banda, tamén se concretan preto de 150 convenios de colaboración con entidades, asociacións e agrupacións sociais, deportivas culturais e educativas, que supoñen unha demostración do compromiso do goberno coa cidade e cos colectivos que traballan por unha cidade máis participativa e solidaria. Neste sentido, destacan acordos tan importantes como os seguintes: convenios con APAS (495.000 euros); Rede Coruña Emprego (412.000 euros); erradicación chabolismo (380.000 euros); Programa de Emerxencia Social (265.000 euros); Cooperación ao Desenvolvemento e ONG (200.000 euros); fomento do deporte (150.000 euros); Cruz Vermella (126.000 euros); Fundación Adcor (100.000 euros); Fundación Hermanos Tenreiro (100.000); Asociación Alzheimer (100.000 euros); Fundación Padre Rubinos (80.000 euros); Cáritas (48.000 euros), e Aclad (48.000 euros), entre outros moitos convenios de colaboración.

Ademais, tamén se reforza o compromiso co transporte público, cunha partida económica de 4.343.000 euros. Igualmente, contémplase o financiamento de entes públicos como o IMCE (Instituto Municipal Coruña Espectáculos) a Fundación Luis Seoane, o Consorcio de Turismo e o Consorcio da Música.