A Coruña: Protección Civil e Servizos Sociais establecen un dispositivo de urxencia ante a ameaza de fortes xeadas

O Concello estableceu un dispositivo especial ante a ameaza de fortes xeadas para as próximas horas, de tal forma que os equipos de Protección Civil, Bombeiros, Policía Municipal e Servizos Sociais mantéñense alerta para responder ante a previsión meteorolóxica adversa que se anunciou para as próximas horas.

Neste sentido, están previstos os efectivos de Seguridade Cidadá necesarios para atender calquera urxencia, así como para garantir a circulación polas vías da cidade. Desta maneira, dotouse de máis de 200 quilogramos de sal que permitirán atender as necesidades que poidan xurdir en avenidas e roldas da Coruña, co fin de que se poida permitir o tránsito de vehículos en caso de xeadas.

Doutra banda, tamén dende a área de Servizos Sociais, a través dos centros cívicos e do Servizo de Urxencias Municipal (Semu), mantéñense alerta para responder a calquera posible demanda que poida xurdir e ofrecer atención aos máis necesitados, prestando especial colaboración ás entidades sociais e benéficas da cidade no caso de que o mal tempo supoña un incremento na demanda.

De igual modo, Protección Civil colaborará neste servizo, apoiando na rúa a atención ás persoas que o necesiten, así como en posibles traslados a centros de atención da cidade.

Desta maneira, coordinouse un servizo especial desde o Concello que comprende as distintas áreas de Seguridade Cidadá e Servizos Sociais para responder adecuadamente á ameaza de condicións meteorolóxica adversas.