"Está enrocado"

Un día despois da multitudinaria manfestación contra o borrador do decreto do galego, dous partidos da oposición, PSdeG e BNG, reclamáronlle ao presidente Alberto Núñez Feijóo que volvese ao consenso e retirase un texto que motivou tamén unha folga xeral no ensino.

O secretario xeral do PSdeG, Manuel Vázquez, instou a Núñez Feijóo para abandonar "o campeonismo" e dar "marcha atrás" na súa política lingüística ante a contestación social fronte ao borrador do decreto. Vázquez destacou a altísima participación alcanzada tanto na manifestación, que "bateu marcas" tendo en conta o seu carácter sectorial e a coincidencia en día laborable -a anterior, do 18 de outubro, foi en domingo-, como na folga no ensino non universitario. "Un Goberno ten que valoralo", apostilou.

O líder socialista subliñou que o decreto do bipartito - "sen ser perfecto, porque ningún ou é", apuntou- "non xerou ningunha folga". Había, engadiu, unha parte da sociedade galega, "a máis identificada co castelán e que quere educación só en castelán", que si estaba en contra do decreto pero subliñou que a contestación era substancialmente inferior. "Nós temos un decreto e Feijóo ten un borrador que puxo de uñas a toda Galicia", declarou.

Respectar os sinais de indentidade do país

Respecto diso, insistiu no éxito da folga "ideolóxica" do xoves, que mobilizou a comunidade educativa non por cuestións retributivas ou de horarios senón porque se están atacando "os sinais de identidade do país". "O presidente galego non pode converterse en ariete contra o idioma", concluíu o secretario xeral do PSdeG, quen negou as críticas do PPdeG e de Feijóo respecto da suposta división interna dos socialistas galegos na materia.

"Feijóo é un mentireiro", lamentouse e asegurou que a división interna si é evidente nas filas do PP, onde xa se oíron voces contrarias ó decreto como a do vicepresidente do Parlamento e aspirante a presidir o PP de Ourense, José Manuel Baltar, que cualificou o borrador de "insulto a Galicia". Respecto disto, pediulle a este deputado "coherencia" e que vote en contra do decreto se chega como está agora á Cámara.

Vázquez asegurou que os socialistas galegos teñen perfectamente definida a súa posición en materia lingüística: "Queremos consenso desde un punto de partida que é o de 50% e 50%", sinalou, reclamándolle a Feijóo "un pouco de por favor e de humildade" e instándoo a "non recorrer ao insulto cada vez que algo non lle gusta". "Feijóo fala bastante máis do que pensa e non nos debería ter metido nesta confrontación", proclamou.

Pola súa banda o voceiro nacional do BNG, Guillerme Vázquez, reprochoulle a Feijóo que "non dea saído do embolado" no que se meteu polo borrador e instouno a "explicar" por que co decreto do bipartito "o 50 por cento creaba conflito e era imposición" e, con todo, o propio mandatario autonómico aclarou, tras o último Consello, que nas bases presentadas se recolle ese equilibrio entre as linguas cooficiais ata introducir o inglés.

Tras reiterar a necesidade de que se retire o decretazo contra o galego", Guillerme Vázquez concluíu que o presidente da Xunta agora o "único que intenta é disimular" e utilizar "mantras" como acusar os defensores da lingua propia de "extremistas", a pesar de que --considerou-- os "únicos extremistas son os "populares".

Guillerme Vázquez subliñou que a mobilización en Compostela foi consecuencia da "reacción social" contra todas as "mantras" utilizadas, na súa opinión, polo Goberno autonómico e o PPdeG, entre as que mencionou a "mantra da liberdade ou da falsidade de que os defensores do galego queren un monolingüismo" neste idioma.

O BNG: "O inglés non ten que ver coa diminución do galego"

Respecto diso dunha terceira lingua, asegurou que "o inglés non ten nada que ver con esta cuestión", posto que os nacionalistas son partidarios de "aprender inglés, francés, alemán ou chinés". Con todo, avisou de que as competencias en idiomas estranxeiros "se solucionan dedicando máis diñeiro ó ensino de linguas, creando laboratorios de idiomas nos centros ou mellorando o cociente de alumnos por profesor". "Que terá que ver o inglés coa diminución do galego nas aulas?", apostilou.

Os nacionalistas cuestionan a actitude dialogante do Goberno autonómico con base nas declaracións do seu presidente nas que advertía de que non se modificarían aspectos fundamentais do decreto. Tamén censurou que apele ó mandato 1 de marzo para xustificar a súa política lingüística.

CARLOS CALLÓN Dimisión de Jesús Vázquez

O presidente de A Mesa pola Normalización Lingüística, Carlos Callón, advertiu onte de que a manifestación celebrada en Santiago contra a proposta lingüística da Xunta foi "o punto de partida" e instou o conselleiro de Educación, Jesús Vázquez, para "dimitir", xa que "non lle queda outra saída".

En rolda de prensa, Callón destacou o "clamor unánime" en defensa do idioma durante a manifestación co apoio "de todas as entidades representativas" no ensino, para reclamar que se manteña polo menos un 50 por cento de presenza do galego no idioma de impartición das materias. Con este fin, explicou que a súa entidade ofrece a disposición da sociedade un modelo de documento para presentar alegacións en relación coas bases para a elaboración do decreto do plurilingismo e para solicitar "a aplicación real e efectiva" do decreto 124/2007 e do Plan xeral de normalización

"Temos a convicción de que este decreto o imos tombar ", destacou Callón, para destacar que "a inmensa maioría -dos estudantes- apoiaron o paro de onte" nas aulas, ademais do "profesorado". "A realidade non se corresponde cos datos da Xunta", aclarou.
Fuente: galicia hoxe