Os partidos políticos débenlles ás caixas galegas 5.360.000 euros

Caixa Galicia e Caixanova financiaban ó peche do ano 2008 con 2,7 millóns cada unha das formacións que agora van designar os seus membros nos consellos de administración. O BNG debíalles 3.411.400 euros, o PP un millón e o PSOE, 855.600.

Un mergullo nas memorias das dúas caixas sobre responsabili­dade social corporativa (RSC) co­rrespondentes a 2008, últimas publicadas, aínda que nun futu­ro próximo estarán listas as do ano pasado, achéganos un dato revelador: ó peche dese exerci­cio, os partidos políticos gale­gos, aqueles que teñen repre­sentación nas corporacións locais ou lexislativos autonómi­cos que poden participar nos seus procesos electorais de ambas as fi­nancieras, mantiñan un saldo vivo en operacións de crédito con Caixa Galicia e Caixanova que ascendía a 5.360.000 euros, preto de mil millóns das anti­guas pesetas.

A cantidade en ambas as caixas é similar. Caixa Galicia mantiña por esas datas operacións de financiamento por un valor cerca­no a 2,66 millóns, con só dous protagonistas: o BNG, que suma 1.851.400 euros, e o PSOE, con 807.600 euros. En Caixanova en­contramos algúns actores máis: o BNG volve ser o que máis recursos requiría, polo menos ata a conclusión de 2008, con máis dun millón e medio de euros; un pouco máis abaixo, con algo máis dun millón, estaría o Partido Popular, e os seguintes, con moito menos capital pres­tado, son os 55.000 euros de Coalición Galega; 25.000 dos socialistas; e Progresistas Vigue­ses, con 3.000 frugales euros. A través do Banco Gallego, filial da caixa do sur, o PSOE sumaría outros 23.000 euros.

Con estes datos, apreciamos que o BNG é o partido que máis saldo vivo mantén en opera­ciones de créditos con ambas as caixas, ó sumar 3.411.400 euros; séguelle o PP, cun millón; e o PSdeG, sobre os 855.000 euros.

Unha semana decisiva para a representación nas cúpulas

Sen saír do mundo da políti­ca, arrinca unha semana crucial na que, o vindeiro venres, os partidos terán que ter ce­rrados os nomes dos repre­sentantes que queren situar nas asembleas das caixas, como conselleiros xerais, o próximo mes de marzo.

A pesar de que o venres é un día crave, as organizacións aínda contan con marxe para pechar a listaxe de nomes. En xeral, os partidos apostarán por nomes que se axusten ó perfil financeiro, e xa barallan varias opcións.

O PSdeG segue defendendo o SIP para manter a marca do país

O deputado do PSdeG Abel Losada insistiu hoxe en que unha alianza a través dun SIP permitiríalles ás caixas galegas manter a súa "marca" e a súa "sede física" e censurou que a Xunta leve a cabo "campaña de bloqueo" e de "confrontación" cara a Vigo.

Neste sentido, atribuíu á intención do Partido Popular de sacar réditos electorais de cara ós próximos comicios municipais a súa actitude e recriminou que o Executivo autonómico busque "dobrar a vontade" das caixas galegas coa nova lei aprobada polo Parlamento, co fin de "levar" a sede de Caixanova "a outra cidade".

O deputado socialista criticou que o Goberno galego presentará "de xeito parcial" os resultados da auditoría encargada a KPMG e refugase o Sistema Institucional de Protección (SIP) como alternativa. Losada considerou a opción como un "proceso reversible" que mantería "a marca" e a "sede física" das entidades, á vez que lles permitiría desvincularse no momento no que o estimen oportuno.
Fuente y autor: S. RIVEIRO/X. LEIRO /galicia hoxe