Os socialistas reclaman a Educación que estableza o Parlamento como marco de negociación e o Plan Xeral de Normalización como punto de partida

O secretario de Organización do PSdeG-PSOE, Pablo García, reclamou hoxe ao conselleiro de Educación que estableza o Parlamento como marco para a negociación do decreto do galego no ensino. Así o dixo no encontro que mantiveron hoxe na sede da Xunta Pablo García e os portavoces de ensino e lingua do Grupo Parlamentario dos Socialistas de Galicia, Guillermo Meijón e Francisco Cerviño, co conselleiro de Educación, Javier Vázquez, e o secretario xeral de Política Lingüística, Anxo Lorenzo.

O responsable socialista explicou así que o Parlamento de Galicia é "o marco" para o acordo e o Plan Xeral de Normalización Lingüística é "o punto de partida", e reclamou neste sentido que Núñez Feijóo "poña o contador a cero" para elaborar de novo o decreto do galego dende o principio. Engadiu que "si de verdade queren propiciar un novo consenso, as condicións, o marco e as fórmulas que o PP está a por en marcha están moi lonxe de ser as idóneas".

García explicou así polo tanto que "os socialistas nunca consideramos esta reunión como un marco de negociación" para elaborar o decreto do galego no ensino, si ben afirmou que a súa asistencia responde ao "compromiso coa cidadanía galega e coa nosa lingua, así como a "responsabilidade", "respecto institucional" cara o goberno galego.

Engadiu que "os socialistas galegos non temos que demostrar polo tanto o noso compromiso e responsabilidade respecto do consenso lingüístico" xa que, lembrou, "estivemos sempre presentes en tódolos consensos que se deron en Galicia ata o momento respecto da nosa lingua" como foron o Estauto de Autonomía, a Lei de Normalización e o Plan Xeral de Normalización Lingüística.

Os respresentantes socialistas sinalaron no encontro que a Consellería de Educación "non pode pechar os ollos á contestación social xerada polo texto" que presentaron. Insistiron así na necesidade de "poñer o contador a cero" e lembraron a iniciativa socialista para a creación dunha comisión parlamentaria para acadar un acordo sobre o galego que será debatida no primeiro Pleno do próximo periodo de sesións.