A Coruña: Preto de 2.500 maiores reciben a diario axuda a domicilio dos servizos sociais do Concello

A concelleira de Servizos Sociais, Silvia Longueira, destacou a aposta do goberno municipal polo benestar e por mellorar a calidade de vida das persoas maiores e con dependencia que viven na cidade. Ese compromiso plasmouse coa nova Ordenanza Municipal do Servizo de Axuda a Domicilio, que xa entrou en vigor tras ser impulsada polo área de Servizos Sociais.

A responsable de Servizos Sociais, Silvia Longueira, sinalou que o Concello da Coruña realiza un gran esforzo para atender a demanda e axudar aos maiores na súa vida cotiá. Así, preto de 2.500 maiores reciben a diario algún tipo de axuda nos seus domicilios a través dos programas municipais. Deles, 1.400 son usuarios do Servizo de Axuda a Domicilio (SAD), 900 son usuarios da teleasistencia e 175 reciben comida a domicilio.

A concelleira Silvia Longueira explicou, nunha visita a unha parella de usuarios dos servizos sociais municipais que contan cunha auxiliar a domicilio cada día, o obxectivo da nova ordenanza, que ten por obxecto mellorar a prestación dos servizos, adecualos á crecente demanda, e prepara os mecanismos para a aplicación efectiva da Lei de Dependencia. A Ordenanza do Servizo de Axuda a Domicilio (SAD) precisaba, dez anos despois da súa aprobación, unha actualización que contemplase polo menos tres dos aspectos que en maior medida contribuíron ao desenvolvemento do SAD.

En primeiro lugar, o aumento cuantitativo de persoas usuarias do SAD debido á maior esperanza de vida da poboación. Este crecemento cuantitativo ocasionou cambios cualitativos no desenvolvemento e execución do programa, cambios que se refiren sobre todo aos aspectos organizativos municipais e ás relacións do Concello coa empresa adxudicataria. Ambos os extremos son recollidos nesta nova ordenanza.

En segundo lugar, a Ordenanza introduce a necesidade dun Plan de Calidade nas empresas adxudicatarias, a requirimento municipal, que introduce moitas melloras na atención a acódelas usuarias.

En terceiro lugar, a aprobación da Lei de Autonomia Persoal e Atención ás persoas en situación de Dependencia (LAPAD) e o consecuente desenvolvemento do SAAD (Sistema de Autonomía e Atención á Dependencia) está a ter unha enorme incidencia nos servizos sociais municipais e, en concreto no Servizo de Axuda a Domicilio. Esta Ordenanza prevé e prepara os mecanismos opara a súa aplicación efectiva.