Galega ou andaluza?

Cando semellaba que o matrimonio mal avido formado entre a Xunta e o Goberno central estaban a punto de asinar un acordo que permitise desbloquear a recorrida Lei de caixas, desde Madrid chegou a bomba: rachaba unilateralmente as conversas e anulaba a cita que se tiña que producir onte ás 18.00 horas da tarde. Uns visiblemente anoxados conselleiros de Presidencia e Facenda, Alfonso Rueda e Marta Fernández Currás, denunciaron que a proposta feita vía telefónica ó mediodía polo secretario de Estado de Cooperación Territorial, Gaspar Tarrías, era simple: asinar a lei andaluza ou se suspendía a xuntanza porque "non habería posibilidade de pacto" .

Nunha roda de prensa, o titular de Presidencia manifestou o seu "estupor, indignación e sensación de comprobar o grao máximo de deslealdade" do Executivo español coa Xunta. "A chamada (de Zarrías) era para dicir que, literalmente, ou a reunión servía para que a delegación da Xunta asinase a lei andaluza de caixas ou o mellor era que non fósemos á reunión porque non iamos alcanzar ningún acordo", afirmou. Así mesmo, os representantes da Xunta reprocharon que o Executivo central non aclarou en que consiste a proposta. "Non sabemos o que se debate nestes momentos", apuntou a titular de Facenda.

Rueda explicou que, tras recibir antonte outra chamada de Zarrías para convocar a reunión que estaba prevista para onte, o alto cargo comprometeuse tamén a enviarlle un documento ó Goberno galego para que o encontro servise para "seguir avanzando". Con todo, criticou, a formulación de onte fíxose "sen documentos nin aclaracións" e a Xunta descoñece se a pretensión é asumir "a totalidade" da lei andaluza, o que se refire ós preceptos impugnados ou a aqueles sobre os que aínda non hai acordo.

Fernández Currás recordou precisamente que no encontro do martes pasado, ambos os executivos chegaron a un pacto para a modificación de seis dos puntos recorridos e remitiuse a que este acordo foi posterior á proposta feita o luns do presidente galego, Alberto Núñez Feijóo, de "copiar" a lei andaluza para xustificar que non se aceptase a alternativa de Madrid.

Caballero sabíao á vez que o conselleiro

O "procedente", dixo o conselleiro, sería manter a convocatoria da reunión e debater a proposta nese contexto. Criticou que, ó contrario, as "sorpresas non terminaron" coa chamada de Zarrías, senón que "había outra persoa que coñecía a suspensión: o alcalde de Vigo", Abel Caballero.

Gaspar Zarrías quixo saír ó paso das informacións e onte pola tarde, en declaracións a Europa Press, demandoulle á Xunta que "recapacite" porque é "súa" e partiu do propio Goberno autonómico a proposta de adaptar a Lei de Caixas galega á andaluza. Asegurou que, "no afán de buscar un acordo", trasladoulle ó conselleiro de Presidencia, Alfonso Rueda, a disposición do Goberno a aceptar "un texto similar ó espírito" da norma andaluza para dous dos preceptos sobre os que aínda non se chegou a acordo, o que define as maiorías para aprobar as fusións e o da renovación parcial das cúpulas das caixas. Respecto diso, declarouse "sorprendido" pola "intransixencia da Xunta a aceptar o que publicamente foi aceptado polo seu presidente", e precisou que non dan por concluídas as conversas, polo que agarda que a Xunta acepte.

PSdeG: "Queren asaltar Caixanova"

O secretario xeral do PSdeG, Manuel Vázquez, afirmou onte a Efe que o que quere o presidente da Xunta de Galicia, Alberto Núñez Feijóo, "é unha lei para asaltar o Consello de Administración e a Asemblea de Caixanova". Preguntado pola suspensión da reunión, o dirixente socialista recordou que o propio Feijóo dixera, "a todo aquel que lle quería escoitar", que quería "unha lei como a lei andaluza". "Logo de dicir vinte veces: "eu o mesmo que a andaluza", cando llo pon na mesa, di que non lle vale ningún dos dous artigos. Creo que o que non queren é unha lei constitucional ".

Vigo cre que non se adaptan

O alcalde de Vigo, Abel Caballero, atribuíulle onte a desconvocatoria da reunión entre Goberno e Xunta para proseguir as negociacións sobre a Lei de Caixas de Galicia a que a Administración autonómica "non acepta" adaptarse á Lei de Caixas de Andalucía, tal como, segundo afirmou o rexedor socialista, ofreceulle o Executivo central. Segundo denunciou o conselleiro de Presidencia, Alfonso Rueda, o rexedor olívico facía estas declaracións á vez que a Xunta se enteraba da anulación.
Fuente: galicia hoxe