O comisario de Transportes da UE insta a fixar portos refuxio para as catástrofes

O día despois da reunión informal de ministros europeos que se celebrou na Coruña, a cidade acolleu un segundo cumio sobre seguridade marítima, desta volta privado, entre o novo comisario de Transportes da UE, Siim Kallas, a directora de Salvamento Marítimo, María Esther González Saavedra, a secretaria de Estado de Transportes, Concepción Gutiérrez del Castillo, e a directora xeral de Mariña Mercante de Fomento, Isabel Durántez. Tras o encontro, Kallas avogou por cumprir coas medidas aínda pendentes para evitar catástrofes marítimas en lugar de engadir novas leis. Así, instou os países europeos a establecer portos refuxio que acollan os barcos en caso dunha nova traxedia.

O estonio, quen se estreou no seu cargo na cidade coruñesa, cualificou como "absolutamente necesaria" esta medida, da que tantas veces se falou e para a que aínda non hai respostas, ante a posibilidade de que se repitan casos como o do Prestige. Despois da reunión coas autoridades españolas na torre da Capitanía Marítima, Kallas insistiu na importancia de habilitar lugares "que deben estar preparados para dar a resposta que cada barco poida necesitar". O ex primeiro ministro de Estonia recoñeceu que tiña un "interese particular" por visitar Galicia só uns días despois do seu nomeamento, para coñecer de primeira man o lugar no que se produciu o accidente do Prestige en 2002. Ademais, como xa fixera o día anterior, incidiu nas consecuencias positivas que tivo esta catástrofe no debate sobre a aplicación de normas de seguridade no transporte marítimo.

"Antes do Prestige había discusións na UE acerca de eliminar os barcos de casco sinxelo, e despois do Prestige existe unanimidade acerca de impoñer a súa prohibición e a obrigatoriedade do dobre casco", subliñou. Así mesmo, incidiu na importancia de que "cada Estado" vele polo cumprimento das normas.

Kallas descartou nova lexislación e aclarou que "non se está a pensar en cambios drásticos", senón nun "reforzo" e un control a través da Axencia Europea de Seguridade Marítima (EMSA), que fai auditorías periódicas "que reflicten o nivel de cumprimento" de cada Goberno. Puxo como exemplo a "capacidade loxística de todos os departamentos encargados da seguridade, os medios dispostos e todo o que se fixo" en Galicia na traxedia do Prestige.
Fuente: O Xornal de Galicia