Plenario de "luva branca"
Foi un plenario de "luva branca", moi tranquilo. Así cualificaron algúns dos asistentes a reunión do Consello da Cultura na que se aprobou, en presenza do conselleiro Roberto Varela, o informe dunha comisión "plural ideoloxicamente" sobre o borrador do decreto do galego que presentou Núñez Feijóo. Hoxe o informe será exposto publicamente.
O plenario do Consello da Cultura Galega (CCG) aprobou onte, sen oposición e nun clima "tranquilo" o informe presentado pola comisión que estudou o borrador do decreto do galego da Xunta. Foi unha sesión que algúns dos membros do Consello cualificaron de "luva branca", como corresponde nunha "institución onde converxen posicións moi diferentes dentro do galeguismo".
Tras dúas semanas de reunións, a comisión, formada por representantes desas variadas tendencias ideolóxicas, elaborou un texto "bo e ben argumentado", en palabras dun dos seus integrantes, que hoxe darán a coñecer na sede do CCG, en Compostela, o seu presidente, Ramón Villares, e o coordinador da comisión, Henrique Monteagudo.
Precisamente, esa "pluralidade ideolóxica" é o que lle dá, a xuízo dos integrantes da comisión, "unha maior validez, se cabe, ao informe".
O grupo que elaborou o ditame foi nomeado pola Comisión Executiva do Consello e está composto, ademais de por Monteagudo, por Rosario Álvarez Blanco, Víctor Fernández Freixanes, José Antonio García Caridad, Ramón Máiz e Helena Villar Janeiro. Felipe Ferreiro Feijoo e Bieito Silva Valdivia interviron como asesores.
Arredor deste informe creouse unha grande expectativa, tanto na sociedade galega que se mobilizou nas últimas semanas contra a política lingüística de Núñez Feijóo, como no propio Goberno, que o domingo xa deu por seguro que o texto do consello ía cuestionar boa parte do seu borrador e anunciou un cambio significativo na súa proposta a prol de conseguir un maior consenso.
Fuente y autor: Maré/galicia hoxe
