PSOE e BNG din que no último ano o PP só gobernou para atacar a lingua

O PSdeG-PSOE fixo onte balance do ano pasado desde a vitoria electoral do PP para concluír que "un ano despois Galicia está moito peor". A deputada Mar Barcón e o secretario de Organización, Pablo García, salientaron que "o único que significou este ano foi máis paro, máis pobreza e máis tempo de espera por servizos públicos".

Barcón exemplificou as "cifras negativas" que supuxo, ao seu xuízo, o Goberno de Alberto Núñez Feijóo: "250.000 persoas en lista de espera sanitaria, 20.000 persoas máis no paro, 30.000 afiliados menos na Seguridade Social, 54 empresas que pechan cada día, máis de 50.000 familias sen axuda para os libros de texto, deixou sen licitar a metade da obra pública que tiña que licitar e vai retirar 200 millóns de euros das políticas de emprego". Tras esta lista de "números negativos", Barcón salientou que a Xunta si veu "crecer" outras cifras como "os milleiros de persoas na rúa manifestándose polo idioma, polo emprego ou por un hospital público en Vigo". A socialista tamén criticou que outro dos conceptos que aumentaron foron "os 300 e pico vehículos que o conselleiro de Presidencia ten comprado neste ano".

Fronte a esta situación, os socialistas consideran que "só a oposición, os concellos e o Ministerio de Fomento fan cousas en Galicia". Así, puxo como exemplo de desleixo de funcións ao conselleiro de Presidencia, Alfonso Rueda, do que dixo que, en vez de encabezar un gabinete de crise polo temporal, "está estupefacto" polo conflito coa Lei de Caixas e "deixa que as decisións as tomen outros".

Pola súa banda, Pablo García recoñeceu que a derrota de hai un ano foi "traumática por inesperada" e indicou que, a nivel interno, o PSOE valora este ano como un período "de fortaleza e dinamismo". Neste senso, lembrou que se organizaron cinco congresos -un a nivel autonómico e catro provinciais- que se saldaron "a diferenza doutros partidos, con consenso". Para os próximos meses, García confirmou que en xuño o PSdeG celebrará una conferencia política para definir as súas liñas de actuación.
Fuente: vieiros