"Radical é o que desfai todo o feito polo galego nestes anos"

O novo presidente da Real Academia Galega (RAG), Xosé Luís Méndez Ferrín, respondeulle onte ao presidente da Xunta, Alberto Núñez Feijóo, que os "radicais" non son os que participaron na manifestación en contra do borrador do decreto do galego senón "o que desfai todo o que se fixo en todos estes anos" a prol da lingua propia. Ferrín tamén está a favor de defender o galego en Asturias.

O novo presidente da Real Academia Galega (RAG),o escritor Xosé Luis Méndez Ferrín, declarou onte que "a situación de pobreza na que vive a RAG é unha ofensa para o pobo galego". A pesar de mostrarse moi agradecido en nome da asociación, a todas as deputacións e entes privados polas axudas que lles ofrecen, puntualizou que "así non se pode vivir".

Ferrín, nunha entrevista con RNE, asegura que un dos obxectivos da nova directiva da RAG é estar nos orzamentos da Xunta e do Goberno central, dos que permanece ausente. A institución tampouco dispón de fondos propios, senón que sobrevive grazas ás axudas voluntarias proporcionadas polas deputacións que teñen un "compromiso histórico con ela", como é o caso do concello da Coruña, ou das que ofrecen o seu apoio ocasionalmente.

Ferrín, que se reunirá co presidente da Xunta, Alberto Núñez Feijóo, e co resto de partidos políticos para chegar a un acordo parlamentario sobre a situación económica da RAG, sinalou que se necesitaría algo máis dun millón de euros para chegar a "unhas condicións mínimas" coas que se poida pagar os traballadores e cubrir outros gastos da entidade. "Os académicos traballan en réxime de voluntariado, aquí non hai soldos", pero "iso si, están moi satisfeitos con que así sexa, non reclaman nada".

Sobre a declaración feita por Núñez Feijóo de que os participantes na manifestación contra o borrador do decreto eran "nacionalistas con comportamento radical", Ferrín respondeu que "ao meu entender, querer conservar un decreto inalterado pola normalización lingüística é ser conservador", e engadiu que "ser radical é querer desfacer todo o que se fixo en todos estes anos polo galego".
Fuente: galicia hoxe