A UPG vai a por Tello

A UPG vai a por Tello. Ou polo menos, iso é o que parece a xulgar polo texto escrito por Bautista Álvarez no último número de Terra e Tempo, a revista da forza hexemónica do BNG. Nunha sección titulada Carta do presidente, Álvarez despáchase a gusto con respecto ó grupo municipal do Bloque na cidade da Coruña. Malia que Bautista Álvarez deixou de ser na última asemblea da UPG, celebrada en novembro do 2008, o presidente do partido, para dedicarse en exclusiva á fundación que leva o seu nome, o certo é que o histórico nacionalista parece que segue a exercer como tal e non repara en atacar os que se supoñen que deberían de ser os seus compañeiros na formación frontista e que cogobernan no concello herculino co PSdeG desde as eleccións municipais do 2007.

O tenente de alcalde Henrique Tello, a concelleira de Igualdade Margarida Vázquez Veras, o edil de Rehabilitación Urbana Mario López Rico, a encargada de Cultura, María Xosé Bravo, a de Normalización Lingüística, Ermitas Valencia, e o edil de Deportes Xan Xosé Martínez Caxigal están no punto de mira interno, e iso que estes tres últimos son da propia UPG. "Parece que importa máis o prato na mesa da Cámara municipal. Galiza pode agardar. O estómago non. Nunca valeron menos seis concelleiros, precisamente cando estes son necesarios", di Bautista Álvarez no artigo titulado O nacionalismo cruzouse de brazos, un texto no que arremete contra o feito de que na avenida dos Cantóns da Coruña aínda estea colocada unha praca co nome de "Plaza de Orense", en lugar de respectar a toponimia galega, algo polo que tanto loita sempre o BNG. Álvarez asegura que a responsabilidade exclusiva disto non é do PSOE municipal, de tradición castelanizadora. "Castigado un pouco nas últimas eleccións -o PSdeG- viuse obrigado a petar na porta do nacionalismo. Así naceu un matrimonio de conveniencia. Máis, para quen foi a comenencia? Para quen casou polo dote e non podo amor", contesta o articulista, quen advirte de que a denfesa da lingua galega é "patrimonio inalianable para o nacionalismo", ó que non se pode renunciar nun goberno, aínda que sexa de coalición. "As aldraxes ó idioma son causa suficiente para que o acordo sexa declarado nulo. Así se facía cando o nacionalismo era alguén", prosegue o texto, para advertir de que "se nos preocupamos máis por facer número que por construír país corremos o risco de substituír os acoirazados por unha frota de submarinos".

A lingua, imprescindible nos gobernos de coalición

"Pensaba eu que na Coruña había nacionalismo. Non o poño en dúbida. ¡Faltaría máis! Pode ser que se volvese cego. Cruzaríase de brazos, quizais? Por covardía non será, pois non parece lóxico fuxir do combate cando todos os ventos sopran a favor", di Bautista Álvarez, quen insiste en que "nos pactos políticos debe garantise a exclusión de todo aquilo que sexa lesivo dos principios ideolóxicos do aliado. Sen este compromiso sobran outras clausulas. Non hai diálogo posible. Sen idioma non hai nación e sen nación non hai nacionalismo", engade.

Álvarez cre que o BNG local padece "indiferenza" e "preguiza" e que se atopa en "estado clínico" por non presionar o seu socio para un maior labor normalizador da lingua -malia que a concelleira de Normalización é, non só do Bloque, senón da UPG-.

Ante tal escrito, o propio Henrique Tello rexeitou facer ningún tipo de comentario. En declaracións a GH, os máis próximos colaboradores do tenente de alcalde defenderon que o BNG municipal non ten competencias para poder cambiar as pracas das rúas da cidade e restáronlles importancia ás críticas. Aseguran que iso dependente de Infraestruturas, unha área xesionada desde María Pita polo PSdeG, e evitan dar máis explicacións.

Ante tal situación, Bautista Álvarez propón "constituír un comando operativo de nacionalistas da terceira idade e iniciar de contado a limpeza do infamante topónimo" na praca. Se iso se producira, Álvarez pregúntase de que lado estarían os edís nacionalistas: Do lado da liberdade ou do lado do código penal que castiga os que fan estragos na propiedade pública? "Quen o diría! Ás trincheiras, que chegaron os nosos!", conclúe.

A CITA Guillerme Vázquez, de visita na cidade, hoxe

No medio da polémica que vai de boca en boca, o portavoz nacional do BNG, Guillerme Vázquez -candidato no seu día avalado pola UPG para dirixir a formación frontista-, estará hoxe na cidade da Coruña. O acto enmárcase nas visitas que Vázquez está a realizar nos últimos tempos por toda Galicia para coñecer de primeira man os problemas de cada zona e para recabar apoios ó manifesto Galiza ten Dereito, a prol de que a comunidade poida seguir tendo entidades financeiras no país e estas non sexan controladas desde fóra. Vázquez estará no Hotel Atlántico, ás 11.30 horas, cando comezará un encontro sectorial con axentes sociais, sindicais, culturais e empresariais da cidade e comarca.

O SÁBADO Na antesala dun Consello Nacional con debate

As relacións entre a UPG e o resto de correntes políticas que integran o BNG non pasan por unha boa hora. O Bloque afronta este sábado, en Teo, un novo Consello Nacional, que se prevé, canto menos, cheo de debate. O Encontro Irmandiño xa solicitou a inclusión, na orde do día do conclave, dunha proposta para falar e pronunciarse sobre a conveniencia da celebración da Asemblea Nacional Ordinaria do BNG -"que xa corresponde por prazos estatutarios",- antes das eleccións municipais do 2011, para definir a estratexia nacionalista para estes comicios e facer unha acto de reforzo e conciliación de todo o BNG. A UPG non quere a asemblea antes da cita coas urnas e Máis BNG agora tampouco.
Fuente y autor: ROSABEL CANDAL BOUZAS /galiica hoxe