Mar Barcón recomenda a Feijóo que faga "acto de contrición" e deixe de ser "un problema para Galicia"

A portavoz do PSdeG, Mar Barcón, fixo onte balance do Goberno de Feijóo ao cumprirse un ano das eleccións autonómicas e cualificouno de "o primeiro ano perdido do que vai ser unha lexislatura perdida", en especial no que respecta a melloras económicas, creación de emprego e consenso social. Por elo, Barcón recomendou a Feijóo que aproveite a súa visita ao Vaticano para facer "acto de contrición" e deixar de ser "un problema para Galicia" para pasar a resolver os problemas dos galegos e galegas. En rolda tras a xuntanza da Permanente da Executiva do PSdeG, Mar Barcón sinalou que "hoxe a situación económica e social de Galicia e moito peor que fai un ano" debido á "parálise administrativa, ineptitude e ineficacia da meirande parte dos conselleiros, anulación de obras, escasa licitación de obra pública e á renuncia expresa da Xunta a actuar como un goberno e facer algo positivo polo desenvolvemento económico e o fomento do emprego".

Lamentou ademais a perda de consensos en cuestións como a lingua ou o futuro financeiro de Galicia, e sinalou que Feijóo "demostrou ser un especialista en crear problemas onde non os había", polo que lle recomendou "facer un acto de contricción" e "deixar de ser o problema de Galicia para pasar a resolver os problemas". Pola contra, Mar Barcón valorou o traballo de PSdeG en temas como a ordenación territorial, coa proposta dun pacto polo territorio, e a constitución, hoxe mesmo, da ponencia parlamentaria que traballará nesta materia. Anunciou ademais o inicio dunha serie de reunións cos alcaldes, secretarios provinciais e portavoces do PSdeG dos concellos das zonas máis afectadas polo Plan do Litoral, entre eles Carballo, a Costa Atlántica, Pontevedra, A Coruña e a Mariña Lucense.

Nestas xuntanzas abordarán as principais eivas do Plan do Litoral e explicarán as propostas que os socialistas galegos trasladarán á ponencia non lexislativa sobre o Plan de Ordenación do Litoral. Estas reunións complementaranse co traballo que está a desenvolver o foro de urbanismo do PSdeG para mellorar este documento, explicou Barcón.

Caixas

Preguntada sobre as afirmacións do PP nas que responsabilizan a Pachi Vázquez de paralizar as negociacións entre a Xunta e o Goberno central na Lei de Caixas, Mar Barcón lamentou que "as interpretacións frívolas de Feijóo estean a situar ao sistema financeiro galego en jaque mate". Criticou que Feijóo "diga pola mañá que os socialistas galegos non pintamos nada e que o secretario xeral do PSdeG non ten ningunha capacidade de mando, e pola tarde responsabilice a Pachi Vázquez de paralizar as negociacións". "De ser así, a conclusión sería que Pachi Vázquez pinta moito máis, en termos políticos, que o presidente da Xunta", apuntou, "o que en todo caso sería unha eiva de Feijóo".

Enmarcou estas afirmacións na "mala costume de Feijóo de botarlle a culpa aos outros da súa incapacidade" e lembrou que "o fixo cos alcaldes, cos presidentes das caixas, co Goberno central e agora co secretario xeral do PSdeG". Por elo, esixiulle que "asuma a súa responsabilidade" como presidente da Xunta e que tome decisións, aínda que "cada vez que toma unha decisión crea un problema", lamentou. Precisamente dixo que o problema coa Lei de Caixas foi creado por Feijóo, xa que "os socialistas lle dixemos que a estaba negociando ás presas unha lei que tiña elementos inconstitucionais, mentres el optou por tomar tallos e dar unha batalla impropia dun presidente da Xunta", concluíu.

"Se busca responsables, que os busque en si mesmo", apuntou Barcón, xa que el foi o que propuxo copiar a lei andaluza. "¿Que se pode esperar dun presidente que ten esa frivolidade", concluíu.