O Concello ampliará a toda a rede de centros cívicos o innovador servizo de telegerontología que xa conta con máis de 200 usuarios

O Concello da Coruña ampliará o servizo de telegerontología a toda a rede de centros cívicos da cidade, na aposta do goberno municipal polo benestar e a atención aos maiores. A concelleira de Servizos Sociais, Silvia Longueira, presentou o proxecto de ampliación deste servizo de atención ¿en liña¿ para maiores e dependentes que actualmente xa se presta en cinco centros cívicos. O investimento do Plan de Investimento Municipal para iniciar esta ampliación é de 30.000 euros.

O servizo de telegerontología comezouse a prestar na cidade a finais de 2008 e ten como obxectivo mellorar a calidade de vida dos coruñeses tendo en conta as necesidades das persoas maiores e aplicando as Novas Tecnoloxías da Comunicación e a Información (Tics).

O proxecto iniciouse nos centros cívicos do Castrillón, San Diego, Monelos, Os Rosales e Labañou e conta con 230 usuarios. O obxectivo que se persegue é previr situacións de dependencia e promover a autonomía, facilitando servizos de atención a persoas maiores que permitan a permanencia na súa contorna. Ao longo do mes de abril porase en funcionamento nos restantes centros civicos da cidade.

As aplicacións ás que poderán acceder os/as participantes son:

 Estimulación cognitiva: é un programa de intervención cognitiva dirixido a persoas con e sen deterioración cognitiva, e que permite exercitar e traballar aspectos relacionados coa memoria.

Esta aplicación consiste nunha serie de exercicios que realiza o/ a participante de forma autónoma (sen a presenza dun profesional) e que pretenden desenvolver as capacidades de memoria e exercitar aspectos como o cálculo, cultura xeral (xeografía...) e a orientación temporal e espacial.

Para acceder a este servizo é necesaria unha valoración cognitiva previa, para coñecer o estado cognitivo do participante e adaptar os exercicios ás súas capacidades.

O servizo é válido tanto para persoas sen deterioración cognitiva como para persoas con deterioración cognitiva leve. Os exercicios de estimulación cognitiva débense realizar durante tres veces á semana, e cada sesión ten unha duración aproximada de 30 minutos.

 Terapias: a través deste servizo os/as participantes poderán acceder a sesións con diferentes temáticas, talles como sesións nas que se traballa aspectos de actividade física como exercicios para mellorar o equilibrio, exercicios para mellorar a mobilidade (trabállanse movementos de cadeira...) e ademais trabállanse aspectos como a memoria a curto prazo e mantemento de coñecementos culturais a través de simulacións de concursos televisivos como cifras e letras, pasapalabra.

 Tele-profesional: este servizo facilita ao participante e/ou ao seu coidador, o contacto cunha serie de profesionais do centro gerontológico A Milagrosa a través de vídeo conferencia. Os profesionais cos que poderá contactar son fisioterapeuta, terapeuta ocupacional, logopeda e psicologo aos que os participantes poderán formular consultas.

Aposta polo benestar social

A Concellaría de Servizos Sociais vén realizando unha aposta importante polos servizos de promoción da autonomía e prevención da dependencia. Cos talleres de memoria e o proxecto de telegerontología facilítanse servizos de estimulación congnitiva para persoas que non presentan deterioración cognitiva. E para aquelas persoas que están nas primeiras fases de Alzheimer ou outras demencias, púxose en funcionamento no mes de febreiro o proxecto Activa-T en colaboración con AFACO. Ademais, para axudar a familiares e enfermos de Alzheimer, o Concello da Coruña apostou por crear un centro de día no Barrio das Flores.

Por outra banda, máis de mil usuarios benefícianse do servizo municipal para atender ás persoas dependentes nos seus fogares, dentro da aposta polo benestar do goberno local. Co fin de mellorar e ampliar o servizo, o Concello da Coruña, a través da Concellaría de Servizos Sociais, porá en marcha un servizo de axuda a domicilio para persoas dependentes no que se investirán 1,7 millóns de euros.

O Servizo de Axuda a Domicilio Dependencia (SAD Dependencia) consiste na prestación dun conxunto de atencións domiciliarias con carácter personalizado e polivalente, desde unha perspectiva integral e normalizada, a persoas en situación de dependencia.

Desta forma, o Concello prestará apoio persoal, doméstico, psicosocial, educativo e técnico orientado a facilitar aos beneficiarios a autonomía necesaria para manterse no seu medio habitual. Entre a axuda prestada, atópase a axuda para o vestido, calzado e alimentación, fomento de hixiene persoal, limpeza ou axuda para o mantemento de salubridade na vivenda, apoio e acompañamento para realizar trámites, actividades fóra de domicilio, apoio emocional a persoas coidadoras, etc.