Semana de paixón. Javier Losada: "OS CULPABLES DEBERÁN ASUMIR A RESPONSABILIDADE"
O tempo aprema xa, pero as negociacións para activar un protocolo de fusión entre Caixa Galicia e Caixanova non se pechan. Aínda que a Xunta confiaba en que onte, domingo de ramos, puidese arrincar o si de Caixanova para sentar a negociar en serio coa caixa do norte, Julio Fernández Gayoso e o seu consello de administración seguen resistíndose porque, aseguran, os números seguen sen cadrar.
As conversacións de onte non avanzaron o suficiente, e é problable que hoxe continúen, segundo indican fontes do Executivo autonómico, que limitan a "detalles concretos" os atrancos. Mañá, día 30, finaliza o prazo que, segundo algunas fontes, deu o Banco de España para que Caixa Galicia e Caixanova presenten, se así o desexan, un modelo de fusión. O desenlace, nun sentido ou noutro, debe producirse "nunhas horas", insistían onte na contorna dos que están negociando.
A Xunta apura ata o último minuto para lograr a desexada alianza entre as entidades de Méndez e Gayoso, e o que ten claro é que o seu futuro nunca será "unha absorción". Segundo o conselleiro de Presidencia, Alfonso Rueda,"os termos concretos son os que se están negociando agora, pero as liñas xerais son as que son".
Deste xeito manifestouse nunha entrevista na Cadea SER na que afirmou que "non sería unha boa situación" que do proceso saísen vencedores e vencidos. "As forzas políticas e sociais quedaron perfectamente retratadas", aseverou, e recordou que PP, BNG, sindicatos e patronal mostraron a súa postura en favor da fusión das caixas galegas, fronte ó PSdeG, que "demostrou non ter ningún criterio e estar entorpecendo".
Respecto disto, sostivo que "é imposible negociar co PSOE en Galicia" para tratar de buscar un consenso de ambas as forzas políticas e atribuíuno a que "un alcalde (Vigo) di unha cousa e o outro (polo da Coruña), di outra" e o seu líder "non se sabe", salvo "declaracións irresponsables" que, na súa opinión o conselleiro, demostran un "absoluto descoñecemento do que debe ser un líder político". "É imposible negociar así", indicou. Rueda avalou, de novo, a constitucionalidade da Lei de caixas de Galicia aprobada por unha "ampla maioría" da Cámara autonómica (PPdeG e BNG) e rexeitou as declaracións socialistas acerca de que 1.200 millóns de euros non serían suficientes para levar a cabo a fusión dos entes crediticios galegos.
"Hispanidad" apunta á intervención da do norte
Mentres, a comunidade afronta unha "semana de paixón" decisiva para o seu futuro financeiro na que os ruxe-ruxe non faltan. Segundo indica o confidencial Hispanidad, o Banco de España prepararía hoxe a intervención de Caixa Galicia nunha operación suspostamente orquestrada polo ministro de Fomento, o lucense José Blanco, co obxectivo de desautorizar a Feijóo.
"OS CULPABLES DEBERÁN ASUMIR A RESPONSABILIDADE"
Losada: "A Coruña debe seguir sendo a capital financeira galega"
En estoico silencio desde que hai xa unha semana e un día, Caixa Galicia e Caixanova arrincaron as conversacións informais para encarrilar un protocolo de fusión, o alcalde da Coruña falou onte da cuestión que o enfrontou nos últimos meses ó tamén socialista rexedor de Vigo, Abel Caballero. Losada, a cabeza máis visible da parte do PSdeG que defende sen medias tintas a fusión entre as dúas caixas galegas, asegurou onte que se finalmente esta non se produce os "culpables terán que asumir a responsabilidade".
"Habelos, hailos (culpables) -habelos hainos- como as meigas", respondeu o rexedor herculina nunha entrevista en RNE na que sostivo ademais que a posibilidade de lograr unha fusión de Caixa Galicia e Caixanova "ten días". Reclamou, deseguido, "cordura e sentimento de país" na negociación aberta.
Losada insistiu en que está vivindo este proceso con "inquietude" e "preocupación" e atribuíu esta situación a que o proxecto "non foi ben concibido pola Xunta" e cometéronse moitos erros". "Hai que ter temperanza e rigor", subliñou e recalou a súa aposta por que "o poder de decisión siga sendo galego". O rexedor da Coruña volveu ratificar a súa postura por que A Coruña "siga sendo a capital financeira" de Galicia cunha caixa única.
REACCIÓNS
Vázquez ve a Feijóo histérico
O secretario xeral do PSdeG, Pachi Vázquez, asegurou onte que "histérico" constitúe "a palabra clave" para definir o Goberno da Xunta e o seu presidente, Alberto Núñez Feijóo, neste momento das conversacións entre os axentes implicados no futuro financeiro galego e considerou que o máximo mandatario "está traballando para buscar un culpable e non asumir o seu fracaso". Para o líder dos socialistas galegos, está "histérico" porque "é prisioneiro" de "todas as mentiras".
CCOO critica o recurso ó FROB
O secretario xeral de Comfia CCOO, José María Martínez, considera "irresponsable" promover enfrontamentos institucionais a conta do FROB como as protagonizadas polos gobernos galego, madrileño e estremeño e o Goberno central. Neste sentido, Martínez defendeu que "hai que culminar xa os procesos que están en marcha" e resaltou a necesidade de que os gobernos, así como ó Banco de España, se coordinen para culminar o proceso "canto antes", porque 2010 vai ser duro.
Fuente: galicia hoxe
