A Coruña: Servizos Sociais investirá 1.700.000 euros no Servizo de Axuda a Domicilio para dependentes recoñecidos

A concelleira de Servizos Sociais, Silvia Longueira, presentou o Servizo de Axuda a Domicilio para persoas con dependencia recoñecida (SAD Dependencia), no que investirá 1.700.000 euros para ofrecer 250.000 horas anuais de atención. Este servizo enmárcase no programa de atención domiciliaria que desenvolve o Concello dende hai 22 anos e ao que pode acceder calquera persoa que o solicite logo da previa avaliación da área de Servizos Sociais (SAD básico). Neste momento, máis de 1.100 persoas reciben algún tipo de atención domiciliaria nas súas casas e un total de 3.000 usuarios reciben atención por parte dos servizos municipais dentro da área de atención a maiores que inclúe programas como o de Telexerentoloxía, o comedor social de Monte Alto, o proxecto Activa-t ou o recentemente estreado talón restaurante +65.

Longueira lembrou que A Coruña foi a primeira cidade en poñer en marcha unha oficina municipal de atención (OMAD) para a aplicación da Lei de dependencia e que os servizos sociais coruñeses son os que están a realizar con maior celeridade a avaliación e tramitación das solicitudes. "Chegáronse a rexistrar ata 9.000 peticións de información, un volume que só pode ser atendido grazas á eficacia, a experiencia e os recursos dos Servizos Sociais máis desenvolvidos de Galicia", sinalou Longueira.

O SAD dependencia foi adxudicado na última Xunta de Goberno á empresa Valoriza S.A. por un período de dous anos, ampliable a un terceiro ano. Trátase dun servizo de contido máis amplo que o SAD básico, cunhas prestacións máis específicas dado o perfil de persoas ás que se dirixe e as súas necesidades.

A intensidade do servizo pode ser de ata 90 horas mensuais dependendo do grao de recoñecemento de dependencia. Prestarase ininterrompidamente os 365 días do ano, é dicir, domingos e festivos incluídos. O horario ordinario é de 7.00 a 22.00 horas.

O horario axustarase ao máximo ás necesidades das persoas, podendo prestarse o servizo en ata catro franxas horarias ao longo do día. En casos determinados, logo da valoración previa do equipo técnico da Oficina de Dependencia, pode prestarse horario nocturno, de 22.00 a 7.00 horas. Intentarase evitar o cambio excesivo de persoal nos domicilios, limitándoo a un máximo de 4 auxiliares ao longo do ano.

As atencións de carácter persoal non sofren variacións significativas, salvo a de adaptarse a cada situación, no entanto, si se incrementan atencións de carácter doméstico para manter a hixiene e salubridade da vivenda, incluíndo limpezas de máis profundidade e en toda a vivenda. Ao mesmo tempo inclúense tarefas de mantemento dos utensilios básicos, como por exemplo, cambio de lámpadas, etc.

As atencións máis novas do novo servizo, non obstante teñen que ver cos servizos complementarios, como as axudas técnicas (aluguer de guindastre, camas articuladas...); podoloxía; perruquería; limpezas especiais e outras atencións de apoio, asesoramento e rehabilitación (terapia ocupacional, psicolóxico de apoio, logopedia etc.)

Estes servizos complementarios prestaranse no domicilio. Poden formar parte do paquete de atencións, sen custo engadido, (só se se require valoración positiva do Equipo técnico da Oficina de Dependencia) ou poden contratarse a título privado, coa vantaxe de que a empresa está obrigada a prestar estes servizos cunhas tarifas reducidas establecidas no contrato.

O Servizo de Axuda a Domicilio do Concello da Coruña enmárcase no Programa Municipal de Atención Domiciliaria que, esquematicamente, ten os seguintes contidos:

1. Servizo de Axuda a Domicilio

a) Básico

b) Dependencia

c) Urxencia Sobrevida

2. Servizo de Teleasistencia

3. Servizos de Comidas a Domicilio

4. Servizo de Reparacións en Domicilio

Outros programas de carácter preventivo:

5. Talón Restaurante + 65

6. Comedor social de Monte Alto.

7. Telexerontoloxía.

8. Activa-t.