Acusan a Feijóo de "apuñalar á lingua": ESIXEN A PARALIZACIÓN DO DECRETO DO GALEGO NO ENSINO E A RECUPERACIÓN DO CONSENSO

O portavoz do Grupo Parlamentario dos Socialistas de Galicia, Xoaquín Fernández Leiceaga, esixiu hoxe a paralización do decreto do galego no ensino e a convocatoria dunha comisión parlamentaria que permita recuperar o consenso antes do mes de xullo. Reclamou a "necesaria discriminación positiva a favor da nosa lingua" antes do Pleno que mañá debaterá unha moción socialista sobre o galego no ensino.

O responsable socialista reclamou así unha Comisión parlamentaria na que debater "sen excluír ámbitos e que paralice o decreto para rematar antes do verán e ofrecer unha solución para o curso que vén". Desbotou así a proposta da Xunta de retomar o diálogo excluíndo o uso da lingua no ensino e na administración porque, dixo, "non se pode apuñalar á lingua no ensino e na administración e chamar aos grupos para intervir nos coidados paliativos".

Reclamou un "compromiso real de paralizar as súas pretensións", xa que o contrario será "perpetrar a maior agresión contra o galego na historia da autonomía mentres nos ten entretidos en cuestións menores". Instou deste xeito a resolver a problemática do uso do galego en educación infantil e a súa exclusión en determinadas materias, e cualificou de "franquista" a pretensión de que as matemáticas non poidan darse en galego.

Sobre o anuncio de Feijóo de retomar a consulta aos pais a través dunha Lei supón "burlar o espírito do Estatuto e da Constitución". Dixo que a consulta sobre o uso do galego debe ser decidida polo conxunto da sociedade "a través dos órganos oportunos" e engadiu que os pais xa participan a través do Consello Escolar, onde están representados e onde tómanse as decisións organizativas adecuadas.

Austeridade real

O portavoz do Grupo Parlamentario dos Socialistas de Galicia reclamou á Xunta "pasar da retórica a un programa de austeridade real" consensuando no Parlamento un Plan de Axuste Orzamentario en Galicia que respecte os gastos sociais fundamentais e contribúa a elevar os ingresos na facenda autonómica. Reclamou a convocatoria dunha Comisión parlamentaria que acorde o axuste, ultime un plan de loita contra o fraude fiscal e reconsidere as bonificacións fiscais nos tributos competencia da Xunta.

Leiceaga lamentou que a pesares dos anuncios de austeridade Feijóo teña paralizada a eliminación de 46 organismos autónomos. Lembrou que a eliminación de 33 destes organismos sería posible polo inicio do proceso polo goberno socialista, a pesares do cal "a súa situación legal e administrativa é hoxe a mesma que cando Feijóo tomou posesión", mentres cos 16 restantes "aínda non fixo nada".

Deste xeito, propuxo que a Xunta tome a iniciativa para acadar o aforro na súa actividade eliminando os superdelegados e os gastos no parque móbil da Xunta, ademais de aplicar software libre -aforrando o gasto das licencias informáticas-, e axustando os salarios de altos cargos, parlamentarios e dos membros do gabinete, medidas das que a día de hoxe "aínda non temos ningunha noticia".

Leiceaga reclamou tamén un Plan de Loita contra o Fraude Fiscal e a convocatoria dunha Comisión parlamentaria que reconsidere as bonificacións fiscais nos tributos sobre os que a Xunta ten capacidade normativa e que supoñen 125,8 millóns de euros. Permitiría restaurar o gasto sanitario, educativo e de políticas de emprego compatibilizando a austeridade co mantemento do gasto social e dos investimentos prioritarios.

Dixo tamén que a Xunta "non é consciente das dificultades que vai ter que afrontar" por mor da crise económica, e neste sentido aludiu ás "dificultades serias que atopa a Xunta para o financiamento previsto no orzamento de 1.000 millóns de euros".