Mesa anima a que ninguén que teña sensibilidade polo galego quede na casa este Día das Letras

A Comisión Permanente da Mesa pola Normalización Lingüística compareceu en conferencia de imprensa para realizar unha declaración animando á cidadanía a participar na manifestación convocada para o vindeiro Día das Letras e para reclamarlle ao presidente da Xunta a "retirada do ilegal decretazo contra o galego e o cesamento do seu conselleiro de Educación, por incompetente e incapaz". O presidente da Mesa, Carlos Callón, sinalou que "despois da desautorización sen paliativos por parte do Consello Consultivo, ao goberno de Núñez Feijóo só lle queda unha saída: manter o decreto de 2007, que está refrendado polos tribunais e apoiado pola comunidade educativa".

Desde a Comisión Permanente da Mesa (conformada polo vicepresidente, Fran Rei, a secretaria xeral, Iria Taibo, e a vogal Susana Romero) animouse a "todas as persoas con sensibilidade polo galego" a que "non queden na casa este Día das Letras", pois "é necesario un empurrón final para pararmos este decretazo tan lesivo contra a convivencia e contra a nosa cultura". Nese sentido, sinalaron que "o relatorio do Consello Consultivo ten que ser un aliciente para participarmos nesta mobilización que se prevé multitudinaria".

O presidente da maior asociación cultural de Galiza sinalou que o informe "de altísimo nivel xurídico" do Consello Consultivo sinala con toda claridade que o decretazo "desvirtúa dereitos, propón un modelo que non ten cabida no noso ordenamento xurídico, non respecta a Lei de normalización nin a letra e o espírito da Constitución". Callón subliñou que, "quen lea o relatorio do Consultivo, verá que non se critica só a pseudoconsulta a nais e pais, senón que se desautorizan xuridicamente todos e cada un dos piares do decretazo". Na conferencia de imprensa, o portavoz da entidade impulsora e coordinadora de Queremos Galego leu algúns fragmentos do texto do Consello Consultivo, facendo especial fincapé no seguinte: "A acción normalizadora da lingua propia ten que implicar, necesariamente, a adopción de accións e medidas de apoio singularizado ou reforzado para garantir a subsistencia e desenvolvemento desta lingua."

"Todo isto quere dicir que, se a Xunta introduce todas as mudanzas que lle indica o Consello Consultivo, acabará tendo un decreto como o que está actualmente en vigor, que está respaldado polos tribunais e pola comunidade educativa. Se non atende ao dito polo Consultivo neste contundente e documentado informe, e continúa con esta imposición unilateral, o decretazo saínte nacerá morto, por contravir o ordenamento xurídico aprobado en democracia", concluíu Callón.
Fuente: A Mesa