O galego queda na aldea

A competencia lingüística do alumnado en Galicia "é superior en castelán", sobre todo "en expresión escrita". Esa é unha das conclusións dunha investigación desenvolvida pola Universidade de Santiago de Compostela (USC) baixo a coordinación do profesor Bieito Silva, quen subliñou unha maior regularidade no caso da competencia oral entre os dous idiomas.

A investigación, promovida tamén polo Instituto de Ciencias da Educación (ICE), foi presentada onte polo propio Bieito Silva xunto ao secretario xeral de Política Lingüística, Anxo Lorenzo e o director do ICE, José Cajide. Os resultados baséanse en entrevistas con 1.153 alumnos de cuarto curso de educación secundaria, representativos dos 21.136 matriculados no curso 2008-09, indicou Bieito Silva.

Segundo os resultados da mostra, nunha escala de 1 a 5 na que a media resulta o 3, os alumnos mostraron mellores competencias en castelán (3,04) que en galego (2,77), tanto en escritura como en expresión oral (3,77 en castelán e 3,66 en galego).

Silva considerou que os resultados son prematuros, xa que só se trata dunha mostraxe, e precisou a relevancia de factores como o nivel socioprofesional e sociocultural dos pais dos alumnos.

O profesor da USC considerou a hipótese de que, "se os contextos" que rodean o alumno "son diferentes" e "o imput favorece máis unha lingua que a outra", é "lóxico" que o alumnado galego falante que vive nun ámbito "mixto" adquira competencias semellantes en ambas as dúas linguas, ao contrario que os estudantes castelán falantes.

Subliñou que o estudo mostra que os alumnos teñen "resultados bastante homoxéneos nas dúas linguas tanto en expresión oral como escrita, de maneira que son bastante parecidos".

Con todo, precisou que os que teñen como lingua principal o castelán obteñen mellores resultados que en galego e viceversa, e tamén apuntou que hai un predominio do galego no ámbito rural e do castelán en zonas urbanas, cuestións que considerou que xa poñen de relevo outros estudos.

Silva indicou que se trata da primeira mostraxe con carácter científico de estudantes de secundaria para determinar o coñecemento do seu dominio das dúas linguas oficiais, e reiterou a necesidade de profundar máis sobre diversos aspectos.

Nese sentido, advertiu de que non se poden "extrapolar" os resultados, xa que se limitaron a unha "carta formal" cunha serie de tarefas que os alumnos debían completar, pero "iso non cobre todo o que se entende como competencia escrita". Anxo Lorenzo, pola súa banda, subliñou que se trata "dunha avaliación nunca feita ata agora" e apuntou que o proxecto de decreto da Xunta sobre a repartición idiomática no currículo escolar pretende establecer un "equilibrio" entre o galego e o castelán. Ao fío diso, apuntou que aínda que "hai un sector que reclama unha discriminación clara e positiva do galego no ámbito educativo", a sociedade quere un maior equilibrio. A investigación revela que son moitos os factores que inciden na adquisición de competencia en galego, e quea estes se encontran en boa medida fóra da escola. Neste sentido, "o peso significativo das variables sociodemográficas e sociolingüísticas na aprendizaxe do galego" reafirmaría "a intención de Política Lingüística de desenvolver medidas que complementen o labor realizado dentro do sistema educativo e que aseguren a transmisión e a aprendizaxe da lingua propia de Galicia fóra do contexto escolar", dixo Anxo Lorenzo.

ANUNCIAN QUE SEGUIRÁN DANDO AULAS EN GALEGO

Fronte de 4.530 profesores

Representantes de Queremos Galego entregaron onte no Rexistro Xeral da Xunta 4.530 sinaturas de profesores e profesoras que se adheriron á campaña para manifestar a súa intención de continuar a impartir as aulas en galego. Coa súa sinatura o profesorado tamén manifesta explicitamente o seu rexeitamento ao denominado Decreto do Plurilingüismo.

A campaña, segundo o portavoz da plataforma, Carlos Callón, púxose en marcha polo "ataque, sen precedentes, contra o noso idioma ao incluír no decreto a prohibición -que por vez primeira se recolle na lexislación galega- de impartir materias en lingua galega, nomeadamente as de Matemáticas, Física e Química e Tecnoloxía, ademais de proscribir o galego na práctica en toda a educación infantil das cidades e principais vilas do país".

Para Callón, "estes son 4.530 alegatos contra a prohibición do galego e en defensa da aplicación dos consensos a que chegamos entre todas e todos" e "4.530 protestas contra o feito de que Galiza sexa a única autonomía do Estado onde se poderá expedientar unha profesora ou un profesor por impartir as aulgas no idioma propio, algo que non acontece en ningunha outra, nin tan sequera nas gobernadas polo PP, como Valencia".

Ademais, preguntouse "se o presidente da Xunta di que non fai nada máis que aplicar o seu programa, que nos explique en que punto dixo que ía prohibir que se poidan impartir aulas no noso idioma, en que punto lles dixo aos electores que se gobernaba ía expedientar o profesorado por dar as aulas en galego".

Para Anxo Louzao, secretario nacional de CIG-Ensino, "estamos ante as materias de ámbito científico-técnico e coa prohibición de impartilas en galego preténdese trasladar a imaxe de que o noso é un idioma de segunda, que non pode ser vehículo normal para impartir nas aulas materias relacionadas co mundo da ciencia, aumentando así os prexuízos, os complexos e o autoodio cara ao noso idioma, que é o que pretende Educación e a Xunta". Louzao e Callón tamén quixeron recoñecer a implicación das profesoras e dos profesores, ao que deron os seus parabéns, pola súa rápida reacción contra o decretazo, e porque foron "sumamente receptivos" a esta campaña, que aínda non está rematada, de recollida de sinaturas.
Fuente: galicia hoxe