O gran fiasco

Tras o demoledor informe do Consello Consultivo, o presidente da Xunta, Alberto Núñez Feijóo, tivo que prescindir da medida estrela do polémico Decreto do Plurilingüismo -a consulta aos pais- para quitar adiante o texto, aprobado onte polo Consello da Xunta sen que, até o momento, se fixese público na súa versión definitiva. Con todo, Feijóo quixo tranquilizar a boa parte do seu partido -que coincidía nas súas teses co colectivo Galicia Bilingüe- sobre a consulta e prometeu que antes de finalizar a lexislatura o Goberno galego impulsará unha lei para "garantir" a participación dos pais na educación.

O presidente, nun novo atranco da súa xestión, mantívose firme nas liñas xerais da súa política lingüística: "Queremos democratizar a Administración educativa e que a participación dos pais teña apoio legal", defendeu Feijóo na roda de prensa posterior ao Consello da Xunta, que aprobou na súa reunión de onte o novo decreto do idioma no ensino. Este será publicado no Diario Oficial de Galicia (DOG) nos próximos días e entrará en vigor o próximo curso 2010-2011, substituíndo o de 2007, aprobado polo bipartito.

A Xunta, explicou o presidente, retira a consulta en Primaria e Secundaria por "falta de cobertura legal", despois de que o Consello Consultivo ditaminase que podería vulnerar preceptos constitucionais e alertase de indicios de ilegalidade e tras coñecer o informe da Asesoría Xurídica. Fronte a iso, o decreto do plurilingüismo mantén a consulta aos proxenitores sobre o idioma en Educación Infantil, cunha "precisión" na redacción orixinal do artigo, xa que, segundo explicou Feijóo, "hai xurisprudencia" que a "avala", en referencia ao Tribunal Superior de Xustiza de Cataluña e ao Tribunal Supremo.

"Cada ano, en Educación Infantil, os pais informarán a Xunta sobre cal é a lingua materna dos seus fillos e será vinculante", detallou Feijóo, quen opinou que o texto final impulsado por Educación é fiel á "palabra dada" xa que "incorpora" as consideracións do Consultivo e respecta os "compromisos electorais".

Así, insistiu, contra o parecer de institucións como a Real Academia Galega, o Consello da Cultura, os sindicatos, asociacións de pais e todos os colectivos que reclaman unha discriminación positiva para o galego, e malia os datos que advirten das carencias no coñecemento de galego da xente máis nova -o último informe do Instituto Galego de Estatística, sen ir máis lonxe, ou o máis recente Mapa Sociolingüístico de Galicia da RAG-, en que o novo texto "garante" o equilibrio lingüístico no ensino e a "competencia plena" nos dous idiomas cooficiais.Tamén resaltou que "inclúe" a introdución dunha lingua estranxeira e avala a "liberdade" -demanda de Galicia Bilingüe- dos alumnos para dirixirse ao profesor ou realizar os exames na lingua que escollan.

Na súa intervención, Feijóo remarcou que o decreto inclúe "a máxima participación posible" das familias na elección do idioma no que estudan os seus fillos , pero reafirmouse en que nun Estado "democrático" os pais teñen "dereito a ser consultados" no conxunto das etapas e que teñan unha participación activa na Educación. -En realidade, co decreto do bipartito, os pais xa podían participar das decisións a través dos seus representantes nos Consellos Escolares-.

Con tal fin, avanzou que unha vez se poña en marcha o decreto, o Goberno galego elaborará unha lei para "mellorar" a convivencia nos centros, "coidar" o papel e a autoridade dos docentes, -proposta que foi tan debatida a iniciativa do PP na comunidade de Madrid-, e dotar "de maior participación" os pais non só na elección do idioma no que estudan os seus fillos senón no conxunto dos procesos educativos. "Queremos resolver o problema de alegalidade que o Consultivo pon en cuestión no decreto", subliñou o xefe do Executivo, quen incidiu en que será o Parlamento que "autorice ou non" se se fai esta ou outras consultas. O seu obxectivo é ter "antes de rematar o ano" esta lei xa que, segundo apuntou, "non hai ningunha similar" noutras comunidades.

Con todo, asegurou que unha vez que se aprobe esta norma non será necesario modificar de novo o decreto para adaptalo a esta e insistiu en que os pais de Primaria e Secundaria serán consultados sobre a lingua "esta lexislatura". E máis, subliñou que el "non está de acordo" con que a Administración do Estado "lle teña que dicir ás comunidades como poden ou non consultar". Preguntado pola consulta en Infantil que xa recolle o texto autorizado onte, o xefe do Executivo galego rexeitou que "unha casa" nos sobres de matrícula vaia supoñer un incremento de custos e asegurou que ascender a lingua "vai máis alá dun decreto ou dunha idade concreta".

Asegurou que foi imposible "consensuar" o decreto con PSdeG e BNG porque "non fixeron ningunha alegación". Ao respecto, criticou as "manifestacións previas" da oposición contra a súa política lingüística.

O peor dos "ataques" desde "os Reis Católicos"

As reaccións non se fixeron esperar e o secretario xeral do PSdeG, Manuel Vázquez, asegurou que Feijóo, "está a escribir un dos episodios máis lamentables" de "ataques sufridos" polo galego "dende os Reis Católicos".

Ante esta situación na que, a xuízo do socialista, "toda Galicia está desgustada" co decreto, reclamou a súa retirada para acordar un entre todas as forzas políticas en comisión parlamentaria. Pola súa parte, o deputado do PSdeG José Luis Méndez Romeu,, mostrou a súa "satisfacción" pola retirada da consulta, xa que "evitará o oprobio que pasou o Goberno galego coa lei non nata das caixas, na que perdeu bastantes meses". A Plataforma Queremos Galego emitiu un comunicado onde lamenta que Feijóo "se manteña na súa prepotencia, sen escoitar o clamor social contra a súa política galegófoba" e rexeitou o "decretazo contra o galego" que volveu presentar onte o presidente da Xunta "con só unha pequeniña nova capa de maquillaxe".

Queremos Galego sinalan que as liñas xerais do texto "conculcan a Constitución, o Estatuto, a Carta europea das linguas e a Lei de normalización lingüística". "Se alguén o dubida, só ten que ler o informe elaborado polo Consello Consultivo, que desautoriza punto por punto todos os piares do decretazo contra o galego", observan.

O presidente da Mesa pola Normalización Lingüística, Carlos Callón, incidiu en que "aínda que o decretazo fala dun 50% de materias sinaladas para impartir en castelán e 50% para impartir en galego, a verdade é que o peso horario desas materias en español é superior, polo que non hai equilibrio nin desde ese punto de vista". Ademais, lembrou que "Galiza é a única comunidade do Estado español na que se quere prohibir por decreto que se poidan impartir algunhas materias na lingua propia".
Fuente: Galicia hoxe