A lea a dous non cesa

O secretario xeral do PSdeG, Manuel "Pachi" Vázquez, advertiulle onte ó conselleiro de Presidencia e número dous do PPdeG, Alfonso Rueda, de que "non está capacitado" para falar de política dada a súa "aposta polo transfuguismo e pola corrupción" e por ocupar unha praza no Concello de Cambados (Pontevedra) de forma "fraudulenta".

Despois de que o dirixente popular afirmase a fin de semana que votar "o PSdeG ou o BNG" é "votar a Zapatero", Vázquez resaltou que José Luis Rodríguez Zapatero é "o presidente de España" e, dito isto, contrapuxo as súas actuacións coas de Alfonso Rueda, cuxo modelo é "o da corrupción e o do transfuguismo".

"Apostou polo transfuguismo e pola corrupción en Gondomar e Mos e aplicará este modelo en todos os sitios onde o poida aplicar", reprobou, para subliñar a continuación que esta política tamén é practicada polo presidente da Xunta e xefe de filas do PPdeG, Alberto Núñez Feijóo.

Neste escenario de "precampaña electoral", o líder socialista desafiou a Rueda para "explicar o seu contrato" coa Deputación de Pontevedra "se ten ganas de falar de política municipal", dado que o conselleiro "figurou como asesor de Rafael Louzán" durante a etapa na que pediu unha excedencia do seu cargo como secretario municipal en Cambados para dedicarse á Secretaría Xeral do PPdeG.

"Creo que non só non está capacitado para falar de política, senón para ser conselleiro de Presidencia", opinou "Pachi" Vázquez, para quen "non pode velar polos contratos de todos os galegos quen incumpre o seu contrato e estivo ocupando unha praza de forma fraudulenta".

Un partido municipalista por definición

Finalmente, sobre as eleccións municipais do ano próximo, subliñou que todas as alcaldías das cidades galegas "son socialistas" e destacou que "o partido municipalista por definición é o PSdeG".

Na mesma liña, despois de que a voceira do PSdeG, Mar Barcón, apuntase o pasado sábado que "é un milagre" que o seu homólogo no PPdeG, Antonio Rodríguez Miranda, "siga na Cámara" autonómica -logo de cobrar axudas de custo indebidamente e de devolver o importe monetario tras saír o caso á luz-, Vázquez indicou que apenas se sorprende de nada relacionado con esta formación logo de 20 anos en política, "vendo como se rin deste país". En todo caso, en relación coa actitude de Antonio Rodríguez Miranda, o dirixente dos socialistas galegos apuntou que "a culpa non é de quen aperta o gatillo, senón de quen manda apertalo".

A maiores, sobre a querela que o Partido Popular anunciou a semana pasada que interporía en relación coa suposta trama agraria na que estaría involucrado o PSOE e o sindicato Unións Agrarias, con presunto desvío de millóns da Xunta, Vázquez indicou que os servizos xurídicos do seu partido non teñen constancia de "ningunha noticia" respecto diso.
Fuente: galicia hoxe