As bases da fusión

Despois de tantos meses de atrancos, Caixa Galicia e Caixanova representaron unha unión modélica e, con puntualidade británica (ou galega), cumpren os prazos marcados para conseguir a pactada fusión paritaria e chegar a tempo para as axudas do Fondo de Reestruturación Ordenada Bancaria (FROB), cuxo prazo expira mañá.

Onte, os consellos de administración das entidades déronse a man e aprobaron o protocolo e o plan de integración, que bendí unha nova caixa de aforro cuns 90.000 millóns de euros de volume de negocio e unha rede de máis de 1.100 sucursais. Despois de coñecer a noticia, a Xunta, que foi informada nunha reunión coas cúpulas das caixas, respira máis tranquila ó ver cumprir os prazos e ve como se avanza "cara a unha entidade única", segundo indican fontes da Consellería de Facenda, que terá o visto e prace do gobernador do Banco de España, Miguel Ángel Fernández Ordóñez unha vez feitos os axustes necesarios.

Tanto Caixa Galicia como Caixanova informaron a Comisión Nacional do Mercado de Valores (CNMV) da aprobación do protocolo e do plan de integración para os efectos da solicitude de 1.162 millóns de euros ó Fondo de Reestruturación Ordenada Bancaria (FROB), segundo detallan as dúas entidades nun comunicado, no que precisan que hoxe presentarán oficialmente a documentación no Banco de España.

Así mesmo, estiman que o beneficio neto medio anual (logo de impostos) da caixa galega resultante superará os 320 millóns de euros entre os exercicios 2010 e 2015, ano no que se amortizará o FROB e permitirá achegar a eficiencia da nova entidade ó 50 por cento grazas á obtención dunhas sinerxías netas de máis de 330 millóns de euros.

A integración de Caixanova e Caixa Galicia orixinará unha entidade financeira cuns 90.000 millóns de euros de volume de negocio e unha rede de máis de 1.100 sucursais, aínda que o plan inclúe a reestruturación de 300 oficinas (menos de 200 en Galicia), ademais da prexubilación de 1.200 empregados.

A sede social fíxase na Coruña e a dirección executiva do negocio en Vigo, a sede institucional, que acolle os distintos órganos de goberno e das comisións, estará en Vigo, mentres que A Coruña será a sede da asemblea xeral, aínda que haberá cosedes representativas, comerciais e operativas en ambas as cidades.

Ambos os consellos de administración aprobaron a configuración do comité de dirección da caixa fusionada, que estará integrado, ademais de polo director xeral, José Luis Pego, e o director xeral adxunto executivo, Javier García de Paredes, por outros dez directivos procedentes dos actuais comités de dirección das dúas entidades.

Así, o plan de integración inclúe o equipo de xestión da nova caixa galega, que estará formado por doce executivos, a metade procedente de cada unha das caixas.

O proxecto de fusión desenvolve os acordos dos consellos de administración dos pasados 11 de maio e 14 de xuño, co obxectivo de definir as regras de organización e funcionamento da caixa resultante durante o período transitorio de integración, e entre outras establécense os principios de goberno durante o período transitorio, un deles a igualdade nos órganos de goberno.

A asemblea xeral terá 320 conselleiros xerais

Así, a asemblea xeral estará constituída por 320 conselleiros xerais, o consello de administración terá 22 vogais e as comisións de control, delegada e de retribucións, investimentos e obra social tamén serán paritarias.

Durante a primeira metade do período transitorio (18 meses), as funcións de presidencia, que terá voto decisorio en caso de empate, exerceraas o copresidente procedente de Caixanova e durante a segunda o que proveña de Caixa Galicia. A orde de presidencias nas dúas metades do período transitorio é inverso na Comisión de Control ó do Consello de Administración.

Tamén se constitúen dous consellos territoriais, un na Coruña (co ámbito territorial das provincias da Coruña e Lugo), e outro en Vigo (ámbito territorial de Pontevedra e Ourense).

Os consellos de administración tamén acordaron que a nova caixa galega asuma todos os dereitos e obrigacións de ambas as caixas e que non exista liquidación de ningunha delas.
Fuente: galicia hoxe