As Pontes, Meirama e Repsol da Coruña, no 'top tres' da contaminación
O efecto invernadoiro non é algo alleo á nosa comunidade, senón un fenómeno ó que contribuímos co noso gran grao de area todos os días do ano. Galicia contamina máis do que lle toca tanto por focos de emisións, como por habitante e quilómetro cadrado. Así o revela Ramón Varela Díaz, autor do informe As fábricas do cambio climático. As 20 principais industrias contaminantes en Galicia, serie que GALICIA HOXE publica dende mañá con motivo do Día Mundial do Medio Ambiente, celebrado onte baixo o lema Moitas Especies. Un Planeta. Un Futuro. Catedrático de Bioloxía e Xeoloxía e doutor en Bioloxía, Varela é, sen dúbida, unha da voces máis autorizadas para alertar dunha realidade cada vez máis preocupante: o aumento imparable das emisións á atmosfera e a recrudescencia do efecto invernadorio. Para iso, ó longo de vinte días, este xornal publicará un minucioso estudo sobre as vinte industrias máis contaminantes na nosa comunidade, así como as súas consecuencias no consumo e na saúde. De seguido, o autor realiza unha explicación desta análise.
Xustificación do estudo
Os rexistros dos cambios na composición da atmosfera durante o último milenio mostran o rápido aumento das concentracións de dióxido de carbono que se poden atribuír ao crecemento industrial desde 1750. As emisións de gases de efecto invernadoiro e aerosois que proceden da actividade humana modifican a composición da atmosfera, e tenden a quentar o clima da terra. Espérase que as concentracións de dióxido de carbono, a temperatura media mundial da superficie terrestre e o nivel do mar aumenten durante o século XXI. A día de hoxe xa existen indicadores biolóxicos e físicos do cambio
climático:
- Nivel medio mundial do mar: aumentou o réxime medio anual de 1 a 2 milímetros durante o século XX.
- Duración, grosor e extensión da cuberta de xeo do mar Ártico: diminuíu o xeo unhas 2 semanas durante século XX en latitudes medias e altas do hemisferio Norte. O grosor reduciuse nun 40% desde finais do verán a principios do outono e diminuíu a extensión nun 10-15% dende a década de 1950 durante a primavera e verán.
- Glaciares non polares: retirada xeralizada no século XX.
- Cuberta de xeo: diminuíu a súa área nun 10% dende 1960.
- Permafrost (solo): derreteuse, quentouse e degradouse en rexións polares,subpolares e montañosas
- Fenómeno do Neno: maior frecuencia, persistencia e intensidade nos últimos 20-30 anos. Aféctalle á atmosfera e aos océanos nos seus recursos.
- Plantas e animais, migracións: desprazamento cara aos polos e cara a maiores altitudes de plantas, insectos, paxaros e peixes. Anticipación en floración de plantas, chegada de paxaros migratorios e anticipación en datas de crianza.
Industrias que se van estudar
A lista que se ofrece refírese as 20 industrias máis contaminantes, tendo como contaminante principal ao Dióxido de Carbono . A lista inclúe os complexos industriais que superaron o umbral de información publica ao longo do 2007 e 2008, últimos datos que aparecen no Rexistro de Emisións europeo PRTR e que ofrece PRTR-España.
Ao escoller o criterio de ordenalas de maior a menor por emisión do contaminante dióxido de carbono, principal gas de efecto invernadoiro, quedan fóra industrias ou complexos industriais que tamén son moi importantes pola súa contaminación pero noutros contaminantes (caso de PSA de Vigo). Neste momento as industrias acaban de comunicar os datos de emisión do ano 2009 e espérase que se poña a disposición pública no mes de novembro. A análise inclúe:
1. Breve información do grupo empresarial ao que pertence a industria.
2. Información xeral sobre a industria que se analiza.
3. Emisións á atmosfera e verteduras á auga.
4. Análise e comentario dalgún contaminante dos emitidos ou verteduras con relación a saúde
5. Análise do consumo, tanto o de auga como o de electricidade..
6. Análise da información que ofrece o rexistro de emisións, PRTR. (O Rexistro Estatal de Emisións e Fontes Contaminantes, PRTR-España, entrou en funcionamento o 1 de xaneiro do 2008. É a continuación natural do rexistro EPER-España, ao que substitúe de acordo coa nova normativa europea e española (Reglamento (CE) 166/2006 y RD 508/2007).Neste rexistro están os complexos industriais que teñen que declarar as súas emisión, verteduras e residuos)
7. Cadro resumo de emisións segundo aparece no rexistro PRTR.
8. Mapa de situación da industria e fotografía.
Fuente: vieiros
