Cada un no seu sitio

"Eu só teño un candidato, unha aposta e un home: "Pachi" Vázquez". Con estas palabras, o ministro de Fomento, José Blanco, disipaba onte calquera dúbida ó respecto de quen será o aspirante socialista á presidencia da Xunta nas eleccións autonómicas do 2013. O lucense converteuse onte no gran protagonista do acto de clausura da Conferencia Política que durante toda a fin de semana reuniu no Palacio de Congresos de Santiago uns 2.000 militantes e convidados e na que aprobaron o Documento Base que marca a actualización do partido e a súa redefinición en consonancia co momento de crise actual.

Blanco fixo vibrar a un auditorio desexoso de escoitar un discurso enérxico. Como político que xa traballa máis en Madrid que na comunidade, o ministro dixo estar onte moi ledo de verse rodeado "dos compañeiros que me viron medrar politicamente". Orgulloso de ser un dos homes fortes do Goberno de Rodríguez Zapatero, Blanco deixou claro onte que el non quere ser político na Xunta e rivalizar internamente con Vázquez, senón que el aspira á Moncloa. "Estou desexando debater en público con Rajoy", deixaba caer onte, tras asegurar, fachendoso, que "eu fixen nun ano por Galicia máis que Rajoy en oito" durante o Goberno de Aznar. E é que Blanco marcou onte territorios: El, en Madrid, e "Pachi Vázquez", en Galicia. "O PSdeG tomou o camiño acertado, soubo responder con madurez ó fracaso electoral do ano pasado. Reflexionamos sobre o que poidemos facer mal, pero foi máis o que fixemos ben. Cada día máis xente bota de menos o goberno de Touriño. E acertamos, sobre todo, ó reflexionar e non caer en cerimonias autopunitivas; e acertados cando eliximos a "Pachi" como secretario xeral do PSdeG", exclamou Blanco, para acalar supostos rumores de desavinzas internas entre o PSdeG galego e Ferraz.

Pero Blanco foi onte máis alá e fundiu futuro, presente e pasado. Cun ex presidente da Xunta Emilio Pérez Touriño seguíndoo desde a primeira fila, o ministro berrou: "Temos que estar orgullosos do que fixemos. Do Goberno de Gonzalo Fernández Laxe e de despois, do Goberno de Touriño. Non podemos deixar de reivindicar cada minuto a nosa historia, a Touriño e ó seu goberno, porque se renunciamos á nosa historia non poderemos proxectarnos cara ó futuro". Por iso, e mirando fixamente para Touriño -que recibiu un aplauso moi prolongado cando entrou no conclave-, advertiu: "Emilio, non te quero ver nin un día quieto porque todos somos necesarios para gañar as eleccións municipais do 2011, as xerais do 2012 e as autonómicas do 2013". "Vou traballar para que Touriño estea máis presente todos os días do ano", engadía.

Nun discurso longo pero ameno, Blanco avogou por unha Galicia "que non viva das subvencións", senón que "converxa e medre por si mesma" e erixiu o PSdeG na "forza referencial do progresismo e do galeguismo".

Os seus maiores ataques foron, como non, para o presidente do PP, Mariano Rajoy, novamente en clave estatal. "Nós queremos protexer o Estado do Benestar e o PP quere demolelo", denunciou, para acusar a Rajoy de "egoísta" e de "buscar a inestabilidade política" en España. "É un patriota de pacotilla, aproveita o peor momento da tormenta para botarlle a man ó pescozo de quen leva o temón. O PP quere gañar as eleccións a lombos da cirse para despois facer una axuste de cabalo e botarlle a culpa a Zapatero", aventurou.

Peche de filas en torno a UUAA

O secretario xeral do PPdeG, Alfonso Rueda, retaba antonte a José Blanco para que falase, na Conferencia Política do PSdeG, sobre a suposta trama agraria denunciada pola dereita e que involucra o Partido Socialista e a Unións Agrarias nun presunto desvío de mi- llóns de euros da Xunta Bipartita. "Todo o meu apoio a Roberto García, o líder de UUAA, a Pablo García, o secretario de Organización do PSdeG, e a Ricardo Varela, o ex conselleiro de Traballo", dixo o ministro en público, para advertir de que "o PP deteriora a convivencia baseándose na difamación e enganando a xente".

O galego, desde o bilingüismo

Blanco erixiuse nun gran defensor do idioma galego. Nun discurso no que combinou o castelán e o galego, o ministro asegurou que "a esencia da galeguidade está na nosa lingua, cultura e territorio" e asegurou que "Galicia pode medrar, progresar e exportar en moitos idiomas e, por suposto, tamén no propio de Galicia, o galego". Así, Blanco propuxo construír unha Galicia "de futuro", con "identidade" pero "cada vez máis aberta", dado que "a singularidade non pecha portas senón que axuda a posicionarse no mundo".

O AVE Lubián- -Ourense, este mes

O ministro advertiu onte, " para a historia" de que "tardaremos décadas en que haxa unha execución orzamentaria estatal como a do 2009 en Galicia". Blanco prometeu acabar o próximo ano a segunda terminal de Lavacolla, contratar a ampliación da pista de Alvedro, mellorar Peinador e colocar este mes, "a primeira pedra" do AVE entre Lubián e Ourense. Garantiu lealdade á Xunta nas infraestruturas galegas e pediulle a Feijóo que esta sexa recíproca.

José Blanco

"O PSOE imos gañar as eleccións xerais do 2012 para que "Pachi" gañe en Galicia no 2013, como partido maduro e enraizado na sociedade galega que é"
Fuente y autor: ROSABEL CANDAL/Galicia hoxe