Luz verde á fusión

Apenas queda nada. A próxima semana será histórica para as caixas galegas. Se nada se torce (e xa non é tempo para permitirse capricho ningún), mañá, os consellos de Caixa Galicia e Caixanova reuniranse para dar luz verde definitiva ós números do plan de integración, o quen é quen no organigrama directivo e, o máis importante, o protocolo, que as unirá ós ollos da lei en irrompible matrimonio... de conveniencia. Non só para elas, tamén para o conxunto de todos os aforradores galegos.

Fontes próximas ó proceso transmitíannos a emoción que supón estar vivindo un momento coma este. Estar tan cerca. Case tocándoo. Non atoparemos o texto que o 30 de xuño ha de chegar a mans do Banco de España e da Comisión do Fondo de Reestruturación Ordenada Bancaria (FROB) as mesmas cifras que cando ambos os dous consellos selaron o pacto de fusión o día 14. Como adiantamos neste xornal, o gobernador da máxima autoridade financeira, Miguel Ángel Fernández Ordóñez (MAFO), faría os cambios oportunos. E vaia se os fixo. Detállannos desde a mesma fonte que no transcurso da negociación a piques de culminar "reaxustáronse, a proposta do Banco de España, algúns números importantes, aínda que con pequenos cambios". Pedimos algún detalle, pero nos responden que polo menos "ata que se celebren os consellos, chitón".

En canto á organigrama que se engadirá ó documento, estará composto por entre dez a catorce directivos (hoxe Caixa Galicia ten nove, Caixanova outros once). En virtude da paridade e do igualitarismo defendido, son moitos os detalles para ter en conta para saber que homes e de que caixa deben tomar as rendas en cada área, e se esta dependerá da dirección xeral, ou da dirección xeral adxunta, que cambiará de mans de forma rotatoria nos tres anos de transición establecidos.

Dezaoito meses Caixa Galicia, outro tanto Caixanova. Ou viceversa. Pero non só se trata de igualar número, pois hai direccións con máis ou menos relevancia, recursos e ata responsabilidade: por exemplo, é clave o encargado da política de riscos da caixa, mentres o director da obra social é dos postos máis apetitosos pola súa visibilidade, e o responsable da rede ten miles de traballadores e oficinas ó seu cargo. Fiarase fino.

A terceira gran pata, o protocolo de fusión, pode ser a que máis quebradeiros de cabeza está dando, motivando que algunha das reunións desta mesma semana en Santiago se prolongasen ata as catro da mañá, segundo nos comentaron. Non é para menos. Estamos falando do contrato que leva a nivel legal os dereitos e deberes da fusión. Falamos do futuro do aforro de 2,76 millóns de galegos (máis a diáspora), un pastel de 46 millóns de españois e, por que non, capacidade de chegar a ser unha financeira a escala global.

"Co Banco de España xa falamos das cifras e nomes desta fusión, e non haberá sorpresas", sinálanos alguén que segue o día a día da integración. "Ir aprobar ", sinala con seguridade. Outra cousa sería que o problema fose interno, froito do debate entre Caixa Galicia e Caixanova... aínda que ambas as dúas partes cren que, na actualidade, están máis que condenados a entenderse.

Cando este luns, os consellos lle dean o seu ok, e se lle envíe a información ó Banco de España, convocarase, como se prometeu, ás centrais sindicais para darlles a coñecer os pormenores do plan de integración e o protocolo de fusión. Chegarán as filtracións (son decenas de persoas a controlar), e algo máis saberemos do futuro do aforro da comunidade.

MAFO dará o seu visto e prace en dous días

E canto tardarán en decidir os homes de MAFO, e os membros da comisión do FROB? "Un par de días", sinálannos. Só? "Si, o Banco de España traballa connosco", sinálannos. De usar o comodín do tempo extra que ofrecía Bruxelas, nada. "Iso é para as operacións de fusión e sistemas institucionais de protección (SIP) anunciadas a última hora, ás que se dará unha aprobación provisional, e terán que acollerse á prórroga que poden pedir desde o Goberno", din. "MAFO quere ir ó Congreso en xullo cos deberes feitos", sinalan fontes consultadas. Sobre desinvestimentos e outros recortes, lean os datos e despezamento desta páxina. A caixa única non sairá gratis, pero será 100% galega, pegada á terra, e viable.

OS DATOS A petición ó FROB ascende a 1.162 millóns de euros

Ó FROB pediránselle 1.162 mi- llóns de euros. Alto interese, pero interesantes para capitalizar e fortalecer a entidade resultante. Haberá un "ano cero", e aínda que a nova caixa será rendible desde o primeiro ano, nesa primeira etapa será máis pequena que cando andaban as dúas por separado. "Pero máis viable, máis solvente". A partir de 2013 empezará o crecemento. En 2015, será unha caixa maior á suma das dúas. Veremos se é a quinta, sexta, ou aspira a cuarta. A obra social seguirá revertendo en Galicia, o coeficiente de solvencia superará o 7% e o TIER1 estará sobre o 10%. A eficiencia da caixa roldará o 50% grazas a unhas sinerxías netas de 330 millóns.

Posible sede operativa en Madrid. A sede institucional e de negocio para Vigo, a social e fiscal para A Coruña. As dúas operativas, con redución de persoal de servizos centrais en ambas as dúas, aínda que no futuro non se descarta unha terceira na capital de España.

Marca. A nova marca será... Caixa Nova Galicia, Caixa Única, Caixa do Atlántico... ou como queiran chamarlle. Ata despois das calores do estío non é un tema prioritario a tocar, aínda que marque un milleiro de oficinas. o "Proxecto Breogán" busca marca comercial.

Oficinas. Trescentas oficinas por pechar, das que 200 estarían en Galicia. "Son froito das duplicidades e o solapamento de sucursais, tanto dentro como fóra". As outras, os desinvestimentos, implicarán repregamento.
Fuente y autor: SANTI RIVEIRO /Galicia hoxe