Fala Ceibe reclama que o galego sexa recoñecido como lingua propia do Bierzo na reforma da Lei da Comarca

O colectivo Fala Ceibe do Bierzo vén de se dirixir á comisión parlamentaria das Cortes de Castela e León que traballa na reforma da Lei da Comarca deste territorio estremeiro cunha emenda adicional para que o texto legal recolla a existencia da lingua galega como parte esencial da súa singularidade.

O colectivo, cunha intensa traxectoria en defensa da lingua e da cultura galega do Bierzo ás súas costas, recorda que a Lei da Comarca vixente até o momento non recolle ningunha clase de recoñecemento para o galego, nin formal nin práctico, o que constitúe "unha anomalía que debe ser corrixida". Esta ausencia de referencias ao galego, que se mantén no texto da reforma coa que traballan as Cortes castelán-leonesas, contrasta porén co artigo 5.3 do Estatuto de Autonomía, que recoñece expresamente que "o galego gozará de respecto e protección nas zonas en que habitualmente se utilice".

Para Fala Ceibe é lóxico aproveitar a reforma da Lei da Comarca para dotar o galego dun recoñecemento até o momento inexistente.

Na emenda adicional presentada polo colectivo perante a Comisión de Interior e Xustiza das Cortes rexionais, Fala Ceibe reclama para o galego o seu recoñecemento como "lingua propia do Bierzo Occidental" e que, de acordo con isto, o Consello Comarcal elabore un regulamento de usos lingüísticos que asegure unha "presenza progresiva do idioma" en ámbitos como a información oral e escrita que poidan ofrecer as administracións (impresos, bandos, ordenanzas...), rotulaxe, cartelaría, información, publicidade institucional, soportes dixitais, etc.

O engadido proposto por Fala ceibe recolle tamén a creación dun "Servizo Lingüístico Berciano", que ofreza información, asesoramente e medios técnicos e humanos a administracións e colectivos sociais no uso do galego, así como a recuperación da toponimia tradicional na zona do Bierzo ocidental.

Por último, a proposta do colectivo inclúe a regulamentación e ampliación das relacións administrativas con Galiza para a execución de programas de colaboración lingüística e cultural.
Fuente: A Mesa