O TSXG admite a trámite o recurso da Mesa pola Normalización Lingüística contra o decreto que regula o uso do galego no ensino
O tribunal estuda agora se paraliza ou non para o vindeiro curso a normativa sobre plurilingüismo aprobada polo Executivo que preside Alberto Núñez Feijóo
O Tribunal Superior de Xustiza de Galiza (TSXG) admitiu a trámite o recurso presentado pola Mesa pola Normalización Lingüística contra o chamado decreto do plurilingüismo aprobado recentemente polo Goberno que preside Alberto Núñez Feijóo e que regula o uso do noso idioma no ensino. O tribunal estuda agora paralizar a entrada en vigor o curso que vén da nova normativa sobre o galego, o que atrasaría os plans da Xunta.
A Mesa pola Normalización Lingüística recorrera o decreto -ao igual que outras organizacións entre as que tamén se atopa a CIG- ao entender que conculca leis de rango superior, como a de Normalización Lingüística ou o propio Estatuto de Autonomía. Todas estas normas contemplan que "o fomento do galego debe ir de menos a máis e non ao revés", lembra o seu presidente, Carlos Callón, ao tempo que sostén que a normativa da Xunta supón un retroceso na potenciación do idioma propio do noso país.
A Mesa argumentou a súa oposición nos informes elaborados polo Consello Consultivo, o Consello da Cultura Galega e a Real Academia Galega, ao tempo que encargou un informe ás tres universidades que constatou que a normativa podería supoñer "un dano irreparábel ou de moi difícil reparación aos alumnos", en palabras do propio Callón.
Ao mesmo tempo, sinala que confía en que a resolución do TSXG sexa "áxil", pois se fose necesario esperar dous anos a que dite sentenza e non toma nese tempo unha medida cautelar, "poderíase causar un enorme dano á formación lingüística dos estudantes". Ao fío diso, denuncia que "este decretazo vulnera punto por punto tratados internacionais de dereitos lingüísticos", polo que avanza que A Mesa manterá os actos de protesta.
O texto recibiu unha forte contestación por parte da sociedade galega e o seu contido foi recorrido por outras organizacións como a Confederación Intersindical Galega, a plataforma "Queremos Galego" ou a mesma Real Academia Galega
Fuente: Xornal de Galicia
