Un goberno "na picota"

O voceiro da área Institucional do Grupo Parlamentario Socialista, José Manuel Lage, aconselloulle onte ó presidente da Xunta, Alberto Núñez Feijóo, que modifique o seu gabinete antes de que "sexa o poder xudicial o que indique os cambios" e dado que se trata do "peor goberno da historia da autonomía".

Deste modo, en roda de prensa, o deputado barbanzán referiuse ás denuncias que os socialistas presentaron contra a composición do Executivo, por entender que incumpre a Lei de Igualdade no Traballo ó non ser paritario, e contra o conselleiro de Medio Ambiente, Agustín Hernández, pola certificación do final dunha obra que non estaba rematada.

Ante a previsión de que o Tribunal Superior de Xustiza de Galicia (TSXG) se pronuncie sobre o primeiro dos casos a finais de setembro, o socialista revelou que os conselleiros se senten "en situación de interinidade" e que, entre eles, "xa falan de quen pode deixar de ser conselleiro". Ó anterior, o parlamentario do PSdeG sumou a "clamorosa ausencia" de certos conselleiros en plena crise e concluíu que o Goberno galego "non está á altura do que necesita o país". "Máis da metade dos seus membros están desaparecidos e o resto son descoñecidos para a cidadanía", dixo.

Noutra orde de cousas, Lage afirmou que Feijóo "está a incumprir os seus compromisos" ó non levar a cabo a supresión da Sociedade de Desenvolvemento Comarcal (Sodeco) e as 34 fundacións comarcais, o que suporía un aforro de "non menos de seis millóns de euros".

No actual escenario de crise económica, o deputado do PSdeG defendeu a redución da administración paralela ó obxecto de evitar "recortes" no gasto público. "Hai que recortar o gasto improdutivo, porque a prioridade ten que ser manter o sistema público educativo e sanitario", reivindicou, para reclamar a liña seguida a supresión dos delegados territoriais e de Sodeco.

Chama a "adelgazar a Administración"

Dito isto, presentou unha iniciativa parlamentaria na que insta a Xunta para "adelgazar" a administración, dado que esta é "pesada, pouco eficaz e demasiado custosa para o escaso servizo que presta". A súa proposta é a disolución, nun prazo de dous meses, da totalidade de fundacións comarcais; a integración no Igape dos distintos organismos económicos; e a fusión dos catro Xestur provinciais nun solo a nivel autonómico, tal e como se acordou no consello de la Xunta do 24 de abril deste ano.

Xustificou José Manuel Lage o rexistro desta proposición non de lei en que o presidente Feijóo actúa como un "home anuncio", que se dedica a facer "anuncios publicitarios" dunha suposta racionalización administrativa" sen plasmala logo na práctica.

Miranda: "El non as eliminou" A Xunta afirma que extinguirá estes entes

O Goberno galego destacou onte que está a realizar "por vez primeira" un plan para "racionalizar" o sector público na comunidade e "reducir" os entes dependentes da Administración autonómica, ó tempo que ratificou que extinguirá as fundacións comarcais.

Segundo explicou nun comunicado, a extinción destas 34 fundacións terá lugar unha vez que se aprobe o anteproxecto de Lei de Orzamentos Xerais de Galicia, a de medidas fiscais e de réxime presupostario e a de medidas urxentes en materia de ordenación do territorio e do litoral.

En todo caso, tras as críticas vertidas polo deputado do PSdeG Lage, o Executivo de Feijóo destacou que o seu plan de racionalización, aprobado o 22 de abril, ten un ritmo de execución "superior ó previsto". O obxectivo é que o proceso finalice "na lexislatura, aínda que a maioría dos organismos desaparecerían en menos dun ano".
Fuente: galicia hoxe