A lei, o problema lácteo

O conselleiro de Medio Rural, Samuel Juárez, descartou onte tomar medidas contra as industrias lácteas Leite Río, Celta e Lactalis porque asegura que "actúan coa marxe que lles dan as leis". Juárez incidiu en que a obriga das administracións "é esixir que se cumpra coa normativa vixente" e "tratar de que a lei cambie se hai unha inxustiza", para que sexa "máis favorable aos produtores".

En declaracións aos medios, o conselleiro admitiu que, nun contexto en que o importe do leite en Europa está a subir, as condicións permiten "que os prezos subisen máis do que o fixeron" en Galicia e a industria e a distribución "insisten en manter os prezos moi baixos".

Así mesmo, o titular de Medio Rural declarou que fixo "propostas en Madrid para aumentar o poder de negociación dos produtores". Juárez dixo que pretende que "os produtores non teñan que entregar o leite sen saber a canto o van pagar" ata que "a industria o decida despois de comercializar o produto".

Ademais, defendeu que a Xunta premie as industrias "cun comportamento mellor", con incentivos a aquelas que "manteñan o aprovisionamento con contratos homologados". Asegurou que o Goberno galego "desenvolve unha campaña de inspección intensa" nalgunhas áreas porque considera que o produto de baixo prezo necesita "unha atención especial xa que parece difícil que haxa calidade con eses prezos".

O mércores comeza o boicot a estas marcas

Os sindicatos UUAA, XXAA e SLG, así como a a Asociación Galega de Cooperativas Agrarias (Agaca) convocaron a realizar, a partir desde mércores, 8 de setembro, un boicot a Leite Río, Lactalis e Celta, que superan o 40% das recollidas de leite en Galicia pero abóanlles pagamentos ós gandeiros moi inferiores ó resto das empresas. Sindicatos e cooperativas pídenlles ós consumidores que os apoien nesta iniciativa e non merquen estas marcas. O obxectivo é concienciar a cidadanía das dificultades polas que atravesa o sector e "poñer no seu sitio" estas tres industrias.
Fuente: galicia hoxe