A "relación sádica"
O galego será a lingua de referencia do Parlamento e da Xunta, unha decisión tomada onte por unamidade dos tres grupos con representación na cámara, incluído o Partido Popular (PP), que votou a favor da iniciativa presentada por Bieito Lobeira, deputado do BNG. Esta postura a favor provocou que Lobeira, en ton retranqueiro, se referise á "relación sádica" que o PP mantén co idioma galego, en referencia ao polémico Decreto do Plurilingüismo e ao feito de que sexan varios os deputados do PP que falan en castelán na cámara.
O deputado do BNG sinalou que os administrados teñen "o dereito" de ser atendidos en galego por parte do funcionariado e criticou que, en ocasións, isto non sucede. Con esta visión coincidiu o representante do PSOE neste debate, José Manuel Lage, quen subliñou que os traballadores da Función Pública deben ter un alto grao de "compromiso" coa lingua propia. Tamén os populares se mostraron favorables á aprobación deste texto, a través do seu deputado Agustín Baamonde, quen abundou en que o idioma da Administración debe ser o propio da autonomía.
Á marxe desta proposición non de lei, Lobeira preguntoulle ao secretario xeral de Medios sobre a "exclusión" do galego en campañas publicitarias institucionais para anunciar a fin da televisión analóxica e a súa substitución pola TDT. Alfonso Cabaleiro explicou que este tipo de anuncios en castelán son "minoritarios" e asegurou que "non serán habituais". Sobre o caso concreto denunciado polo deputado do BNG, xustificou a súa emisión en castelán por estar dirixido a habitantes de comunidades "limítrofes" con Galicia.
Esta explicación non satisfixo ao parlamentario nacionalista, dado que a Xunta non pode planificar as súas campañas, ao seu xuízo, pensando noutros cidadáns que non sexan os galegos. En todo caso, valorou o "compromiso" coa lingua de Castelao expresado polo secretario xeral.
Na súa última intervención, Cabaleiro concluíu que o idioma galego está "nunha situación bastante óptima" no campo publicitario, algo que atribuíu á súa difusión, principalmente, a través dos medios públicos. Porén, Cabaleiro recalcou que esta lingua está "lonxe da situación ideal" en canto á súa utilización nos medios de comunicación.
NON PEDIRÁ INSUBMISIÓN AO DECRETO UGT vaticina un curso "moi duro"
O sindicato FETE-UGT vaticina un "moi duro" inicio do curso académico 2010-2010 que estará marcado por un "cóctel envelenado" de recortes de persoal en profesorado, persoal de comedores e docentes de apoio, xunto coas "dificultades organizativas" de aplicar o Decreto do Plurilingüismo no ensino. Sobre o contestado texto que impulsou o conselleiro de Educación, Jesús Vázquez, o voceiro de Ensino Público de FETE-UGT, Raúl Gómez, pediu "sentido común" e que se aplique dun xeito "razoado" e "progresivo", tras recoñecer que "a lei está para cumprirse". "Non chamaremos á insubmisión, chamaremos ao sentido común", sinala, para recordar que "o 50 % non se estaba a cumprir".
Fuente: galiciahoxe
