Basta xa! no lácteo

Nin o campo galego é unha aula de matemáticas, nin os seus números unha ciencia exacta. Cada explotación láctea é un mundo, e ningunha coincide ó 100% coas contas dos seus veciños, pois nin todas pro­ducen os mesmos litros, nin coa mesma calidade, nin lles venden ós mesmos clientes, nin cobran as mesmas primas... O que si asegu­ran case todas é que están na ruína. Por iso, para facerse unha idea global o máis fiable é acudir ás táboas que manexa a Conse­llería de Medio Rural, obtidas a partir das declaracións men­suais de entregas realizadas polos compradores. E aí, o que se ve é que ata o mes de xullo pasado as industrias non pagaban máis ou menos nin 28 cénti­mos por litro, mentres que os custos de producilo -aseguran os profesionais- dispáranse ata os 0,38. É dicir, un dife­rencial negativo de 0,10 euros.

Alimentar ó gando, propor­cionarlle coidados veterinarios, vacinalo, pagar as facturas da luz ou encher o depósito do tractor con gasóleo (entre outros gastos) está hoxe por encima da cotización no mercado de cada litro de leite en orixe, se­gundo aseguran os profesionais do sector. Unha situación "insos­tenible", a xuízo dos sindica­tose Xóvenes Agricultores (XXAA), Unións Agrarias (UUAA), Sindi­cato Labrego Galego (SLG) e a Asociación Galega de Coopera­tivas Agrarias (Agaca), que onte iniciaron, arroupados por centos de granxeiros, tres días consecu­tivos de mobilización ante as industrias para esixirlles que pa­guen máis. A planta de Lactalis en Vilalba (Lugo) foi a primeira vítima do enfado dos granxei­ros, que bloquearon as súas instala­cións. Xa pola tarde, acudiron ó centro comercial Carrefour da Coruña e os participantes colocaron pegatinas co lema Estas marcas engánante e destrúen o sector lácteo, con oito marcas, para reclamar o apoio dos consumidores na súa loita.

En declaracións ós medios, a secretaria xeral do Sindicato Labrego Galego (SLG), Carme Freire, volveu cargar contra Leite Río, Celta e Lactalis por pagarlles ós gandeiros "prezos que non permiten vivir", ademais de pedirlle á cidadanía que os apoie na súa campaña de boicot, que se centrará hoxe na planta propiedade de Jesús Lence e mañá en Leche Celta.

Volven á lembranza as tractoradas

Cos seus altos e baixos, o pro­blema de rendibilidade do que se queixan os propietarios de explo­tacións lácteas non é nada novo. Durante o verán de 2009, as mesmas siglas convocantes do boicot aparcaron centos de tractores en Santiago na chama­da Semana en branco para protes­tar polas penurias do sector. A mobilización terminou despois de que produtores, industrias, dis­tribución e o Goberno selasen en Madrid o denominado pacto lác­teo polo que as partes se com­prometían a xeneralizar o uso do contrato homologado, apli­cando un método de referencia que na práctica non frutificou.

¿E que din as industrias? As empresas ven un "despropó­sito" e unha "inxustiza" que se lles culpe dos problemas do sec­tor e tachan de "canallada" esta campaña.

CRÓNICATristura e escepticismo diante da fábrica: "Isto empeora cada ano, así é imposible manter a familia"

Como chamadas á ora­ción desde as mesquitas, as muxidoiras esper­tan unas a outras na ama­neceres de Galicia. Baixo a escarcha, relocen como exemplares case en extin­ción. Os seus donos calculan cos dedos das mans os anos que lles quedan á fronte das granxas: ¿dez?, ¿cinco?, ¿quizais dous? Cos prezos do leite con­xelados e os gastos en as­censo meteórico, ¿cantos valentes queren traballar como gandeiros?

Intentárono todo: asaltos ás grandes mar­cas, derrames de leite, tractoradas polas estradas. Pero o desánimo cre­ce. Mil gandeiros de leite e carne decidiron plan­tarse onte ante a planta de Lactalis, nos arredores de Vilalba. Mozos endureci­dos e veteranos ó bordo da xubilación bloquearon a entrada e saída de camión­s leiteiros, no inicio doutra odisea contra os xigantes do sector. Chega­do desde Mesía (A Coruña), Manuel Nodar suspiraba con escepticismo: "A situa­ción empeora cada ano, che­mos coa sensación de que nos afogamos cos prezos".

Este gandeiro de 56 anos resume a desesperanza do colectivo: "Sentí­monos asfixiados, así é impo­sible mater unha familia". Aínda que Manuel mantén unha granxa de carne, com­parte os desgustos dos seus compañeiros: "Os prezos polos produtos en orixe son cada vez máis baixos, levo non sector case toda a vida despois de traballar noutros sitios, pero o peor está acontecendo agora".

Para apoialos, chega esta iniciativa de bloqueo impulsada polos sindicatos e as cooperativas, que comezou onte diante de Lactalis, onde non permitiron que entrase nin saíse ningún camión do recinto vilalbés.

A secretaria xeral do Sindicato Labrego Galego, Carme Freire, explicou que o seu obxectivo é informar sobre as marcas das empresas que pretenden "destruír" o sector en Galicia, e o seu homólogo de Xóvenes Agricultores, Francisco Bello, reclamou un novo marco de negociacións para que se equiparen os prezos do leite galego ós europeos. Por xustiza.
Fuente y autor: P. HERMIDA / Galicia hoxe