"É un lavado de imaxe"

Sete membros da Alianza Libre Europea, entre os que se atopa a voceira do BNG en Bruselas, Ana Miranda, enviáronlle onte unha carta redactada en galego á comisaria de Educación da Comisión Europea, Androulla Vassilliou para pedirlle unha explicación logo das declaracións realizadas polo conselleiro de Educación, Jesús Vázquez, segundo o cal a responsable europea aplaudiu o Decreto do Plurilingüismo.

A nacionalista Ana Miranda trasladoulle onte a este xornal a súa "sorpresa e extrañeza" polas palabras de beneplácito que o conselleiro lle atribuíu a Vassiliou. Especialmente, segundo remarcan na carta enviada á comisaria, cando "a Comisión Europea non ten competencias directas en materia de regulación lingüística, que corresponde só aos Estados".

Ao seu ver, "a visita de Jesús Vázquez é un lavado da súa imaxe pública que confunde a cortesía da comisaria europea cun aval", tras o malestar que está a causar en moitos centros de ensino a aplicación do Decreto do Plurilingüismo. Por iso, Miranda cre que a entrevista coa comisaria de Educacion "é unha tomadura de pelo á cidadanía". De feito, logo de remitirlle a carta, o gabinete comunicoulles aos eurodeputados asinantes -xunto a Miranda, Oriol Junqueras, Jill Evans, François Alfonsi, Ian Hudhton e Alyn Smith mais Frieda Broepels- que están a "cotexar a información" sobre as declaracións de Vázquez coa que dispoñen eles sobre esta reunión. Miranda mesmo dubidou que o encontro de Vázquez con Vassiliou se tivese celebrado. "Vimos a foto do conselleiro con Doris Pack, membro do Grupo do Partido Popular Europeo pero non con Vassiliou", apunta. De feito, na páxina web da Xunta, as imaxes da visita de Jesús Vázquez seguían onte tendo un pe de foto errado, pois identificaban a Doris Pack como se fose a comisaria europea de Educación.

Na carta que envían os eurodeputados a Vassiliou infórmanlle que o Decreto "non respeita o modelo de plurilingüismo europeo porque non respeita o modelo legal existente de protección e defensa da lingua galega no ensino, vulnerando pois a normativa galega vixente, do Estado español e do Consello de Europa, como a Carta Europea das Linguas Minorizadas e Rexionais".

Solidarízanse coa plataforma Queremos Galego

Os asinantes solidarízanse ademais coa plataforma Queremos Galego que "intentaron deslexitimar" tras unha visita aos responsables europeos da mesma índole que a mantida polo conselleiro de Educación. Na misiva, infórmanlle á chipriota Vassiliou sobre as manifestacións celebradas en Compostela contra o texto aprobado pola Xunta e salientan a "inmensa reacción cívica de protesta de numerosos pais, nais e alumnado e da sociedade civil sobre este Decreto".

Na carta, os membros da Alianza Libre Europea solicitan unha nova entrevista coa comisaria europea de Educación "para trasladarlle a nosa posición e documentación ao respecto da política de plurilingüismo galega".

Segundo explicou Ana Miranda, a finais de mes, o eurodeputado de ERC, Oriol Junqueras, "vai pedir na Comisión de Cultura e Educación do Parlamento Europeo explicacións de por que non se nos informou aos membros desta Comisión sobre esta visita do conselleiro de Educación, Jesús Vázquez".
Fuente y autor: VANESA OLIVEIRA /Galicia hoxe