Galiza, unha nación

O BNG presentou onte as liñas mestras da súa proposta de reforma estatutaria para a Comunidade galega cun novo texto no que declara "sen ambaxes" que "Galiza é unha nación". "Galiza é unha nación e como tal debe ser recoñecida", incidiu o voceiro nacional da formación frontista, Guillerme Vázquez.

Arroupado por diversos cargos do partido e afiliados en Santiago, entre os que non falou o ex portavoz nacional Anxo Quintana, o actual xefe de filas do Bloque fixo pivotar o seu discurso sobre a idea de que "Galicia é unha nación" e, dito isto, criticou "o corpiño estatal" que, na súa opinión, "impide saír do furgón de cola" esta autonomía. "Nós non acreditamos a teoría mil veces difundida de que somos un país pobre que precisa da solidariedade do Estado para sobrevivir", sentenciou.

Así, responsabilizou a política centralista da "destrución dos sectores produtivos básicos, o despoboamento, o envellecemento e a emigración" de Galicia; e utilizou unha cita de Rigoberta Menchú para pedir a liberación da comunidade dese "corpiño" antes citado: "En Galiza non necesitamos que nos boten unha man, bastaría que nola quitasen da garganta".

Esta definición de Galicia como "unha nación" choca coas formulacións do PPdeG, co seu presidente, Alberto Núñez Feijóo, á cabeza, que xa advertiu de que "a única nación" que recoñece é "España". Previsiblemente, a negociación do Estatuto volverá á situación de xaneiro de 2007, cando Emilio Pérez Touriño (PSOE), Anxo Quintana (BNG) e o propio Feijóo non chegaron a superar as súas diferenzas sobre a identidade de Galicia. Pola súa banda, os socialistas decidiron recuperar a fórmula escollida naquel momento polo presidente da Xunta, "Nazón de Breogán" -segundo a letra do Himno Galego- para intentar alcanzar un consenso ao redor da denominación de Galicia.

Axencia tributaria propia, algo esencial

Á marxe da cuestión identitaria, o texto proposto polos nacionalista incide na necesidade de obter "máis autogoberno real" a través dunha axencia tributaria "propia" para a consecución de "autonomía fiscal efectiva" e do establecemento do galego como idioma "oficial".

O galego, co mesmo status que o castelán

Nun acto baixo o lema "Tempo de compromiso con Galiza", Guillerme Vázquez resaltou que "é fundamental que a lingua propia de Galicia sexa oficial no propio país", xunto ó que apuntou que "non será verdadeiramente unha lingua oficial na súa propia terra ata que alcance o mesmo status legal que o castelán".

O status da lingua galega e algúns flocos en financiamento autonómico foron outras das cuestións que imposibilitaron o acordo entre as tres forzas políticas con representación no arco parlamentario autonómico para a reforma do Estatuto de Autonomía de Galicia.

En canto ás propostas relacionadas coa creación dunha axencia tributaria "propia", o líder do Bloque xustificounas en que o actual marco estatuario aprobado en 1981 "se revela" como "absolutamente insuficiente para calquera observador imparcial" en relación con "poder solucionar algúns dos graves problemas económicos e sociais" de Galicia.

Así, avogou por unha axencia tributaria galega que "traia consigo a mellora do financiamento" e dos servizos públicos como a educación e a sanidade. Todo iso, co obxectivo de conseguir "maiores ferramentas para saír da crise con xustiza social".

Suprimir as deputacións a prol da comarcalización

Outras formulaciones teñen que ver co "dereito a organizarse territorialmente en función da realidade física" de Galicia, para o que Vázquez fixo fincapé na importancia de "suprimir" as deputacións para "avanzar na comarcalización".

Á súa vez, incidiu en que se debe lograr unha "autonomía fiscal efectiva", xa que Galicia ten "capacidade para autofinaciarse" e así non terá que "seguir dependendo do que o Goberno central decida".

Tras a exposición, indicou que a proposta do BNG é "un texto de mínimos para avanzar no momento actual" e mostrouse "consciente" de que esta reforma, "aínda non sendo suficiente", si "é necesaria" para "poder gobernar máis eficazmente". Ademais, sinalou que este texto "non está enfaixado pola recente sentenza política do Tribunal Constitucional" sobre a reforma proposta de Cataluña.

COMPETENCIAS EXCLUSIVAS En contra da "invasión estatal"

Vázquez tamén se referiu á situación das caixas galegas, para remarcar que "non é de recibo" que Galicia "non poida regular" o sistema "sen interferencias estatais". Por iso, censurou que o marco político "prepare desde Madrid a privatización do aforro galego para a súa posterior expatriación". Sobre este punto, indicou que se as competencias "fosen exclusivas", poderíase "lexislar en función dos intereses galegos". Con todo, iso non é posible por "un autogoberno raquítico e exposto á invasión estatal".

O voceiro nacional do BNG recriminoulle ó presidente da Xunta, Alberto Núñez Feijóo, que responsabilice da crise "en exclusiva" ó Goberno central, e en cambio, "non utilice as competencias que lle outorga o actual marco político" para facerlle fronte. "¿Se non fai falta un novo Estatuto nin un novo modelo de financiamento, por que Feijóo afirma que non conta con recursos para a prestación de servizos básicos?", inquiriu Vázquez. Aymerich destacou que o "grave problema de desemprego" non vai depender "só" dun novo Estatuto, pero explicou que "o Goberno terá na man unha nova ferramenta" para traballar na súa redución.

PROXECTO AMBICIOSO

Aymerich chama a recuperar o tempo perdido

O voceiro parlamentario do BNG, Carlos Aymerich, que tamén interveu no acto, avogou por "recuperar o tempo perdido", xa que os galegos "teñen o dereito inalienable de decidir" con esta proposta "ambiciosa". De feito, no título preliminar deste novo Estatuto proposto, tamén se recollen dereitos como o pluralismo informativo, a boa administración e "o traballo digno". Ademais, apóstase pola independencia xudicial e por un novo marco de relacións bilaterais entre Galicia e o Estado, ao redor dunha comisión mixta paritaria de cooperación, xunto cunha regulación nova coa UE.

Neste sentido, Aymerich propuxo un marco competencial "máis amplo", con autogoberno na xestión do espazo marítimo-terrestre, a Seguridade Social, o espazo radioeléctrico ou o audiovisual galego.

Máis aló, os nacionalistas fixeron fincapé en "non querer xogar ningún papel mendicante" e reclamaron "poder decidir" con "competencias exclusivas".
Fuente: galicia hoxe