Non é admisíbel que as forzas políticas do Estado digan unha cousa na Galiza e outra diferente en Madrid

Jorquera e Quintana defenderon a proposición de lei do Parlamento galego alegando o dereito de Galiza que, desde o punto de vista constitucional, ten o mesmo rango que Euskadi e Catalunya onde teñen asumido esta competencia desde hai tempo
Nun exercicio de auténtica incoherencia política respeito ao votado no Parlamento galego, o PP e o PSOE impediron no Congreso a aprobación da toma en consideración da proposición de lei do Parlamento galego para que se transfira a Galiza a competencia en materia de tráfico e seguridade vial. O resultado da votación foi de 25 votos a favor, 165 en contra e 146 abstencións. Como non podía ser doutro xeito, o BNG exerceu a congruencia e votou a favor, a proposición tamén recibiu o respaldo de ERC e IU-IC, PNV, CIU, CC, Nafarroa Bai, os votos en contra do PSOE e as abstencións do PP.

Non é admisíbel que as forzas políticas do Estado digan unha cousa na Galiza e outra diferente en Madrid

Os representantes do Parlamento galego puideron facer unha breve réplica ao final do debate, momento no que Quintana, despois de escoitar as intervencións de todos, agradeceu o apoio dos grupos que deron o seu si, e lamentou non estender o noso agradecemento aos grupos maioritarios. Tan democrático e lexítimo é estar a favor da policía galega como estar en contra, pero o que non é admisíbel é que as forzas políticas do Estado digan unha cousa na Galiza e outra diferente aquí. Iso é o único que non é admisíbel.

Preguntouse como é posíbel que se alegue que non é o momento cando o Estatuto galego data do ano 1981 e xa pasaron trinta anos. O deputado do BNG deixou claro ao PP e ao PSOE que é o mesmo procedemento para Galiza que para Catalunya, iso si, hai unha diferenza, eles son cataláns e nós galegos e cando se fala de Catalunya se fala de cuestións de Estado e de Galiza non. Acusou á ambas formacións de ter medo a que na arquitectura institucional do Estado, Galiza xogue o mesmo papel que Euskadi e Catalunya, e asegurou que ese papel o xogaremos porque voltaremos a plantexalo.

Xa na súa intervención, Jorquera amosaba os seus temores e apelaba á reflexión dos grupos maioritarios da Cámara porque se trata dunha demanda unánime, consensuada pero moito nos tememos que os partidos estatais voten en contra, e que asistamos ao espectáculo de que deputados galegos desta Cámara voten en contra.

Lembraba o portavoz do BNG no Congreso que no primeiro Goberno do PP sen maiorías absolutas, CIU conseguiu a competencia de tráfico. Cualificou de anomalía, a cerrazón dos partidos maioritarios que só acceden a negociar cando o precisan como no actual contexto de Orzamentos do Estado.

As intervencións do BNG: un feito diferencial

Anxo Quintana abriu a quenda de intervencións da delegación do Parlamento galego, e comezou sinalando que veño a defender a esta Cámara un acordo unánime para mellorar o autogoberno através da transferencia das competencias de tráfico e seguridade vial. E poucas veces un feito diferencial pode ter tanto peso como o que hoxe defendemos. Quintana explicou que Galiza ten 2,7 millóns de habitantes asentados en 32 núcleos de poboación, a metade do total do Estado, o que conleva unha rede de estradas e unhas peculiaridades diferentes, específicas e non homologábeis a outras partes do Estado. Iso si é un feito diferencial.

O deputado e vicesecretario da Mesa alegou que cando reclamamos esta competencia, reclamamos un dereito para o noso pais, un dereito de autogoberno exercido con responsabilidade. Galiza constitúe unha autonomía igual que outras CC.AA que teñen policía. Temos o dereito a reclamar un corpo policial propio, e a nosa proposta está baseada na simplicidade, na eficacia e no aforro.

Quintana puxo de manifesto que na actualidade a seguridade na Galiza está compartida por varios corpos policiais. Pretendemos un só corpo policial que substitúa aos corpos do Estado, non aos efectivos existentes xa que aspiramos a que formen parte da nova policía galega a crear. O deputado do BNG apelou a unha reflexión: máis dunha vez escoitamos que calquer exercicio de autogoberno debe seguer unhas normas establecidas nun Estado de Dereito. E que, ademáis, a ansia de autogoberno non parta só dunha parte minoritaria, que veña de maiorías. Pois ben, recalcou, a maioría dos galegos apoia a policía propia como teñen Euskadi e Catalunya convencidos de que a xestión vai ser mellor.

Argumentou que esta proposición de lei parte dun acordo unánime e seguimos as canles legais establecidos no artigo 150.2 da Constitución. Polo tanto, cumpridos todos os trámites, e dado que vai en beneficio de todos, animo en nome do Parlamento galego a apoiar esta iniciativa.

Galiza ten o mesmo rango que Euskadi e Catalunya onde hai tempo que teñen policía autonómica

Na súa intervención perante o Pleno na quenda de portavoces parlamentares, Jorquera expresou o total apoio do BNG á toma en consideración desta importante iniciativa que recibiu o respaldo unánime do Parlamento galego e que é froito dun importante traballo de consenso.

Explicou as dúas razóns básicas polas que os nacionalistas galegos apoian esta proposición de lei: unha porque esta transferencia é un elemento indispensábel para o despregue da nosa policía autonómica, cuxa creación foi aprobada polo Parlamento galego, e en segundo lugar, porque o traspaso permitirá a Galiza deseñar plans de tráfico desde as nosas singularidades.

Aspiramos a que Galiza teña unha policía autonómica integral, como teñen Euskadi e Catalunya dixo Jorquera, quen lembrou que Galiza desde o punto de vista constitucional ten o mesmo rango que Euskadi e Catalunya. Temos lingua e cultura propia, aprobamos tamén un Estatuto de Autonomía na Segunda República, tamén accedemos á autonomía pola vía do artigo 151.

Pero sobre todo, apostamos por introducir a racionalidade no modelo policial xa que non ten sentido que o Estado manteña dous corpos policiais diferentes, e un deles de natureza militar. O máis congruente sería integrar ambos corpos nunha única policía de dependencia estatal e compatíbel coas policías autonómicas.

Ademáis, puntualizou o deputado nacionalista, Galiza precisa dos instrumentos que lle permita atender as súas necesidades nas cuestións de tráfico e seguridade vial. Explicou que temos unha taxa de siniestralidade nas vías interurbanas superior á media estatal. Puxo dados sobre a mesa: no 2009, o número de accidentes con feridos na Galiza foi do 6,85% e con vítimas mortais do 9,33%, case un 64% máis do que lle tería que corresponder dado o seu peso poboacional (o 6% do total do Estado).

Mencionou os factores que na Galiza inciden na alta taxa de siniestralidade. O clima e a orografía, a dispersión poboacional que fai que teñamos unha rede moi densa de estradas secundarias con trazados sinuosos, moitos cruces e incorporacións. A pesar desta situación, Galiza é unha das CC.AA onde máis recauda o Estado por infracións de tráfico, pero destina moi pouco á mellora da seguridade vial do noso territorio, temos a cifra máis baixa de axentes por quilómetros de estrada. Ademáis, a Garda Civil de Tráfico prioriza a vixianza nas estradas nacionais de competencia do Estado antes que a rede secundaria, que é onde están a maioría dos accidentes.

Preguntouse se é lóxico que dependamos de que o Ministerio de Interior asigne máis medios e reforce a vixianza nas estradas secundarias que son competencia da Xunta pero non o pode facer porque carece das competencias na materia.
Fuente: Xornal de Galicia